Duod­jegáv­pi lea bisánan – máilmmi dilli váik­ku­ha sámi duojá­riid­da

Sámi stuorámus lágidemiid ja doaluid šluhttejumit váikkuhit garrasit duodjefitnodagaide. Máŋggat leat gidden uvssaid ja gávppašeami dáhpáhuvvá dál dušše neahta bokte.

Lill-Eli Jørgensen-Dahl ii beasa oassálastit koronavirusa dihte makkárge duodjemárkaniidda.
Lill-Eli Jørgensen-Dahl ii beasa oassálastit koronavirusa dihte makkárge duodjemárkaniidda.
Kuva: Lille Li Smykker

Sámi heajat, konfirmašuvnnat, beassášfestiválat ja duodjemárkanat. Dáid lágidedemiid oktavuođas lea maiddái sámi duojáriid hohpoleamos áigodagat. Go sáhka koronavirusa leavvama birra ollii Davviriikkaid davimus osiide, dat váikkuhii njuolga sápmelaččaid beaivválaš eallimii ja boahtte áigái.

– Gálvojohtu nogai seamma áigge go medias álge oidnot ođđasat koronavirusa birra. Gávppašeapmi unnui beaivvis beaivái. Dál mii leat gidden uvssa ja dušše neahttagávpi lea ain rabas, lohká Kautokeino Sølvsmie eaiggát ja silbačeahppi Alex Singer.

– Guovdageainnu márkan lea guorranan dál. Dáppe lea jaskes modus. Olbmot bissot dál ruovttus, muitala nuppi buolvva fitnodatdoalli Singer.– Jáhkan olbmot maid álget dál jurddašit dárkilit masa golahit ruđaid.

– Čiŋat leat luksusgálvvut maid olbmot eai oaste jus ruhtadilli fahkka hedjona. Dat boahtá váikkuhit midjiide ja eará duodjefitnodagaide garrasit. Lihkus eat dárbbat jurddašit dál goit viessoláiggu birra go mii eaiggádit ieža min gávpevistti, muitala Singer.

Alex Singer lohká ahte sámi festiválaid šluhttejumit dovdojit diŋgojumiin.
Alex Singer lohká ahte sámi festiválaid šluhttejumit dovdojit diŋgojumiin.
Kuva: Kautokeino Sølvsmie

Diŋgojumit bissehuvvon

Guovdageainnu Čiŋat gávppi jođiheaddji Biret Ánne Hætta vástida telefovdnii ruovttus. Sus lea duodjegávpi mii leat doaibman juo jagi 1995 rájes. Dál lea dat gitta. – Máilbmi lea bisánan ja gávpi lea bisánan. Olbmot eai vánddar gostege. Eai hálit fitnat nuppiid luhtte ollenge. Ja ságat leat dušše dan virusa birra.

– Dál ii leat earágo vuorddašit mii dáhpáhuvvá. In leat balus gal iežan fitnodatdoaimma dihte. Hætta muitala son lei ollen diŋgot olu vuovdingálvvuid gávpái daningo beassážat leat sámi stuorámus meassostallánáigodat. – Dál leat mearridan sirdit konfirmašuvnnaid boahtte čakčii, diehtá son.

– Mus ledje liidneriessun-diŋgojumit maid lean dál šattan bissehit. Guovdageainnus lávejit maiddái heajat giđđadálvet, muhto daid maid fertejit sirdit boahtte áigái. Mu fitnodaga oassálastin jahkásaš lágidemiide nugo Riddu Riđđui, Márkomeannui ja Vuonnámárkaniidda lea eahpesihkár go ii dieđe mo dát dál ovdána. Hætta gávpi lea sus iežas orrunviesu oktavuođas. Sus eai leat olggobeale bargit maid dárbbahivččii bidját virgelupmui.

Neahttagávpi ain rabas

Áláheajus ássi kárášjohkalaš oahpaheaddji ja sámi designer Lill-Eli Jørgensen-Dahl lea maŋimuš 5 jagi ráhkadan ja vuovdán silbačiŋaid meassuid, márkaniid ja neahttagávppi bokte. Su kunddarat leat Norggas, Ruoŧas ja Suomas.

– Gal dat dovdo ahte dán jagi eai boađe dat árbevirolaš sámi lágideamit Guovdageainnus ja Kárášjogas mat mis leat juohke jagi. Mus leat diŋgojumit barggu vuolde ja neahttagávpi gal lea olles áigge rabas.

– Lea miellagiddevaš oaidnit man guvlui silbba haddi dál manná. Ovdal juovllaid silba divrrui, vihkedallá Jørgensen-Dahl. Son ráhkada earret eará beallječiŋaid ja čeabetčiŋaid silbbas.

– Mun lean bargan daid maŋimuš áiggiid hui olu márkanfievrridemiin ja sávan ahte olbmot ain oastaše mu buktagiid. In dieđe vel sihkkarit mo koronavirusa váikkuhusat bohtet stivret olbmuid ruhtageavaheami. Visot lea nu eahpesihkar juste dál.

Tästä on kyse

Saamenkäsitöiden myynti pysähtynyt – maailman tilanne vaikuttaa saamelaisia käsitöitä tekeviin yrityksiin

– Saamelaistapahtumien peruuntuminen on aiheuttanut saamenkäsitöiden kysynnän ja etukäteistilausten laskun

– Monet yrittäjät ovat laittaneet ovensa väliaikaisesti kiinni, mutta verkkomyynti jatkuu edelleen

– Saamenkäsitöitä valmistavat yritykset ovat epävarmoja tulevaisuuden suhteen, koska eivät osaa ennustaa kuluttajakäyttäytymistä etukäteen