Oh­ce­jo­gas beai­ve­dik­šu fállá gáid­dus­bot­tuid ruovt­tui­de - “Dát lea illu olles bear­ra­šii”


Elle-Sires álgá farga beaiveruovttu gáiddusboddu ja áhčči Ánte Aikio veahkeha stellet buot ortnegii ovdal dan.
Elle-Sires álgá farga beaiveruovttu gáiddusboddu ja áhčči Ánte Aikio veahkeha stellet buot ortnegii ovdal dan.
Kuva: Laura Arola

Koronavirusa dagahan spiehkastatdilli rahpá ođđa vejolašvuođaid ja hutkosiid. Dál buot Ohcejoga gieldda beaivedikšunossodagat girkosiiddas, Gáregasnjárggas ja Njuorggámis leat fállagoahtán ruovttuide gáiddusbottuid.

– Jurdda vulggii das go mánát ahkiduššet iežaset skihpáriid, de smiehttagohten mo buoridit oktavuođaid, muitala árrabajásgeassinhoavda Tea Raudasoja.

Bottut leat vuolgán bures johtui. Vuosttas iđitbottuid ruovttuide dolle vuossárgga 6.4.

Duđavaš vánhemat

Elle-Sire (3 j) čuovvu iđitbottu ruovttustis.
Elle-Sire (3 j) čuovvu iđitbottu ruovttustis.
Kuva: Laura Arola

Vánhemat leat váldán ođđa fálaldaga duođai bures vuostá.

– Muhtun vánhemat leat lohpidan ieža doallat bottu ja lohkat máidnasiid, čilge movttegis Raudasoja.

Vánhen Ánte Aikio mielas gáiddusbottut leat hirbmat buori.

– Lean healkkehan das man bures dát doaibmá, lohká golmma máná vánhen Ánte Aikio moatti bottu maŋŋá.

Olles sin bearaš leamaš ruovttus juo mánotbaji, de gieldda e-boasta gáiddusbottu birra lei somás diehtu.

– Mielas searvvaimet. Elle-Sire (3 j) lea hui ilus ja movttáskii, go bottu áigge dihtoris oidnojedje skihpárat.

Nubbi govve veahkkin 

Duottaraski -ossodaga bargi Ara Aikio lea doallan moadde iđitbottu. Bottuid lea álki doallat rutiinnaid dihte.

– Vuossárga, maŋŋebárga, gaskavahku, duorastat, bearjadat, dadjá son ja gieđat čuvvot lihkastagaiguin hoahkama fáro.

Boddu bistá justa muttágit, vai mánát eai dolkka.

– Iđitbottut mannet njuovžilit ja mánát servet fárrui, go bottu sisdoallu lea buohkaide oahpis, čilge vánhen Ánte Aikio.

Diibmobeali bottu govvemii dárbbašuvvojit guokte olbmo. Boddu dollojuvvo Teams -čoahkkinprográmma bokte.

– Doalan mánáide bottu ja mus lea tableahttadihtor njuni ovddas, mas mánát oidnet mu ja mun oainnán mánáid. Nubbi ferte govvet justa dan, man birra mis lea sáhka go čujuha gieđainis govvii mii heaŋgá seainnis, čilge Ara bottu doallama birra.

(joatkašuvvá gova vuolde)

Ohcejoga Duottaraski -ossodaga bargi Ara Aikio geavaha iđitbottuide tableahttadihtora.
Ohcejoga Duottaraski -ossodaga bargi Ara Aikio geavaha iđitbottuide tableahttadihtora.
Kuva: Outi Paadar

Galgá šaddat fástabálvalus

Raudasoja lohká ahte gáiddusbottut šaddet sis fásta ortnegin.

– Dál álggos šaddat geahččaladdat mii doaibmá bures, muhto jurdda lea joatkit ja viiddidit gáiddusbottuid. Bargit leat nu hutkái ja čeahpi fuobmát čovdosiid.

Ara Aikio muitala ahte dalle go hoavda jearai sáhtašingo doallat gáiddusbottu, de son dajai dalán juo.

Dál Ara pláne iešguđegelágan bottuid.

– Lávlut, lohkat girjji dahje sáhtán máinnastit. Livčče miella juoidá ovttas buđaldit vaikko rissiiguin, muhto dan ferte vuos plánet bures, árvaladdá Ara ja smiehtada maid sáhttá ollašuhttit neahttaoktavuođa bokte ja maid fas ii.

Duottaraski -ossodaga bargi Ara Aikio pláne juo eanet iešguđege lágan gáiddusbottuid.
Duottaraski -ossodaga bargi Ara Aikio pláne juo eanet iešguđege lágan gáiddusbottuid.
Kuva: Outi Paadar

Teknihkalaš gáibádusat ja vejolašvuođat

Vánhen Ánte Aikio mielde bottut leat olles bearrašii somá, vaikko gáibidage bearrašis máŋga dihtora.

– Vielja guovttos vázziba gáiddusskuvlla dihtoriid bokte. Dál Elle-Siresge lea gáiddusbottut, dadjá Ánte.

Ara Aikio ii bala teknihkalaš váttisvuođain, baicce oaidná vejolašvuođaid.

– Dihtorspealuid speallanduogážis lea dás iešalddis oalle olu ávki. Dieđášin máŋgga vuogi mo dán sáhtašii teknihkalaččat buoredit, muhto dat dalle máksá eanet, čilge Ara.

Boahttevuođas juohkehaččas galggašii leat iežas mikrofovdna, vai gullá buorebut maid juohkehaš dadjá. Lassin sáhtašii GoPro kameran mannat olggos.

Gáiddusbottut leat dušše njuolggooktavuođa bokte, dat eai báddejuvvo.

Teknologiabajásgeassin oassi árrabajásgeassimis

Ohcejoga árrabajásgeassinplána oktan ulbmilin lea maid teknologiabajásgeassin diehto- ja gulahallanteknologia geavaheamis.

– Lean hui ilus erenoamážit das, man vuohkkasit vánhemat sáhttet searvat gáiddusbottuide, lohká duđavaš Raudasoja.

Su boahttevuođa niehkun lea ordnet gáiddusbottuid gávpoga beaiveruovttuiguin.

– Livčče somá vaikko Oulu sámegielat ossodagain doallat oktasaš bottu.

Raudasoja ávžžuha eará beaiveruovttuid maid viiddidit bálvalusaid gáiddusoktavuođaid bokte.

Mikä?

Kodit innostuivat Utsjoen päiväkodin etätuokiosta

  • Poikkeustilanne innosti Utsjoen päiväkotia luomaan uuden etäpalvelun koteihin.
  • Ensimmäinen 30 minuutin etätuokio pidettiin maanantaina 6.4. Aamutuokion lisäksi suunnitellaan muun muassa satu- ja laulutuokioita.
  • Kaikki Nuorgamin, Karigasniemen ja Utsjoen osastot pitävät etätuokioita.
  • Kokemukset ovat positiivisia lapsille, vanhemmille ja työntekijöille.
  • Etäpalvelusta tulee vakituinen osa, joten tarjontaa kehitetään ja laajennetaan.