Stuorá­mus oassi Anára skuvlla ohppiin gáid­du­soah­pa­hu­sas

Suoma hálddáhus válddii njukčamánu 16. beaivve atnui spiehkastandili. Dan maŋŋel skuvllat ja oahppoásahusat giddejuvvojedje ja skuvlaoahpahus gaskalduvai 18.3 rájes.

Elle-Matilda ja Nuppu-Maaria Näkkäläjärvi bargaba skuvlabargguid gáiddusoahpahusa bokte nu guhká go skuvla lea gitta.
Elle-Matilda ja Nuppu-Maaria Näkkäläjärvi bargaba skuvlabargguid gáiddusoahpahusa bokte nu guhká go skuvla lea gitta.
Kuva: Tiisu-Maria Näkkäläjärvi

Koronavirusdili dihte ohppiid oahpahus ordnejuvvo dál gáiddusoahpahussan iešguđetlágan digitála oahppanbirrasiid -ja čovdosiid bokte. Ordnet bistá cuoŋománu 18. beaivve rádjái. Servodatkritihkalaš ámmahiin bargi vánhemiid mánáide ordnejuvvo skuvlaoahpahus. Dát guoska 1.-3. luohká ohppiid.

Oahpahus Skype bokte

Anára skuvlla oahppit, njealljátluohkkálaš Nuppu-Maaria Näkkäläjärvi ja su jagi nuorat oabbá Elle-Matilda bargaba dál visot skuvlabargguid ruovttus.

–Moai ožžo bargobihtáid Wilma bokte ja munnos lea maid video-oahpahus Skype bokte. Oahpaheaddji váldá oktavuođa iđitbeaivve ja dan maŋŋel moai barge bihtáid iešheanalaččat. Juos leat gažaldagat, de sáhtte beare riŋgestit oahpaheaddjái.

Ohppiide lea dehálaš doalahit beaivválaš rutiinnaid ja muitit doallat bottuid.

–Moai letne olgun juohke beaivve ja lihkus dáid beivviid leage leamaš fiinna dálki, muitala Nuppu-Maaria.

–Muhto lea dieđusge veháš láittas go ean beasa deaivat ja stoahkat dál olbmáiguin. Sáhttit dušše doallat oktavuođa telefovnna ja Skype bokte.

Nieiddat ipmirdeaba ahte koronavirus lea duođalaš ášši, muhto seammas diehtiba ahte dat ii leat várálaš mánáide ja dan dihte eaba leat balus. Muhto go ii beasa olbmáid oaidnit, de ferteba geahččalit gávdnat eará hommáid áigegollun. Elle-Matilda muitala ahte liiko sárgut ja Nuppu-Maaria fas geahčča tv dalle go ii leat skuvlabargguid áigi.

Bargat skuvlabargguid ruovttus

Juoga buorre maid gávdno dán erenomáš dilis.

–Vaikko lea váivi ahte ean beasa leahkit olbmáiguin,  seammas lea buorre ahte ean dárbbat lihkkat nu hirbmat árrat. Video-deaivvadeami maŋŋel moai ožžo oalle friddja bargat skuvlabihtáiguin. Dat maid lea buorre. Eadni veahkeha munno álot dárbbu mielde vaikko son dieđusge ferte maid bargat iežas bargguid, lohkaba Elle-Matilda ja Nuppu-Maaria.

–Mun gal lean leamaš aivvefal ruovttus. Dušše oktii fitnan biepmogávppis. Dál ii sáhte fitnat ádjá ge guossis vaikko son orru ránnjádálus. Gal dat lea oalle láittas, muitala Nuppu-Maaria.

Beaivválaš oktavuohta ohppiiguin lea dehálaš

Anára skuvlla rektor Marja Seilonen lohká ahte lea dehálaš gulahallát beaivválaččat ohppiiguin.
Anára skuvlla rektor Marja Seilonen lohká ahte lea dehálaš gulahallát beaivválaččat ohppiiguin.
Kuva: Olli Miettunen

Anára skuvlla rektor Marja Seilonen lohká ahte eanas oassi sin ohppiin leat gáiddusoahpahusas. Skuvla lea dál bargiidčoahkkimis mearridan váldit atnui oahpahusas maid Microsoft Teams -vuogádaga vuoi buohkat geavahivčče seamma reaiddu. Skuvla ordne ohppiide geavaheaddjikontuid ja gulahallanrusttegiid nugo dihtora.

–Lea dehálaš ahte oahpaheddjiin lea beaivválaš gulahallanoktavuohta ohppiiguin. Bargobihtát galget leahkit dakkárat ahte oahppit sáhttet bargat daid ruovttus iešheanalaččat. Gáiddusoahpahussii gávdno gal olu materiála, muhto váidalahtti eai nu olu sámegielat reaiddut, čilge Seilonen.

Son muitala maiddái ahte sii deattuhit man dehálaš ohppiide lea doalahit beaivválaš rutiinnaid ja váldit bottuid skuvlabargguid gaskkas.

Oahppo- ja kultuvraministeriijá lea mearridan ahte vuolledásiid skuvllat rahppojuvvot  1.-3.luohkáide mánnodaga 23.3. maiddái earáide go servodatkritihkalaš bargi vánhemiid mánáide. Ministeriijá liikká ávžžuha ahte oahppit galget bissut ruovttus, juos fal lea vejolaš.

Buot koronaođđasiid gávdná dáppe: https://www.lapinkansa.fi/koronavirus

Mikä?

Suurin osa Inarin koulun oppilaista ovat etäopetuksessa

  • Hallitus määräsi koulujen sulkemisesta 18.3. lähtien. Inarin koulun oppilaat saavat etäopetusta koteihinsa erilaisten digitaalisten alustojen välityksellä.
  • Koululaiset Elle-Matilda Näkkäläjärvi ja isosiskonsa Nuppu-Maaria Näkkäläjärvi tekevät etätehtäviä niin kauan kuin koulu on kiinni.
  • Rehtori Marja Seilonen painottaa matalan kynnyksen yhteydenpitoa koulun ja kodin välillä.
  • Hallitus on määrännyt etäopetuksen kestävän 18.4. asti.