Spieh­kas­tat­di­lis neaht­ta­ma­te­riá­lat gea­va­hus­sii – Dav­visá­me­gie­lat fá­lal­da­gat gávd­no­jit juo oalle olu

Sámegielaide leat almmustahtton juo oalle olu iešguđege lágan materiálat, mat heivehit bures gáiddusoahpahussii dál go skuvllaid uvssaid giddejedje.

Materiálat gávdnojit iešguđege neahttasiidduin ja eará bálvalusain. Fálaldagat gávdnojit iešguđege ahkásaš mánáide ja skuvlalaččaide muhto maiddái rávesolbmuide.

Gávdnojit jietna- ja e-girjjit, videofilmmažat, podkásttat, mobiila- ja lávdespealut ja iešguđege lágan buđaldanevttohusat. Sáhtát oahpásmuvvat siidduide ja válljet mii heivešii dutnje dahje didjiide.

Materiálat gáiddusoahpahusa várás

Sámedikki skuvlen- ja oahppomateriáladoaimmahat lea čohkken neahttamateriálaid. Sámediggi lea ráhkadan anáraš-, nuortalaš ja davvisámegiela alfabehtafilmmažiid, bustávvatávvaliid ja videoid.

Sámedikkis lea maid oahppamateriálaid neahttagávpi. Doppe leat rabas digitálamateriálat, mat leat nuvttá geavahussii ja mii dievasmahttojuvvo dađistaga.

Eará materiálaid sáhttá viežžat siiddus, gosa materiálat leat oahpahusgielaid mielde. Dáid várás dárbbaša dovddaldaga, man sáhttá diŋgot doaimmahagas.

Sámegielat jietnagirjjit

Go girjerájuid sámegielat jietnagirjjit leat eanáš CD:an, de dál sáhttá dorvvastit Spotifyi -musihkkabálvalusa jietnagirjjiide. Dan bokte mánát sáhttet guldalit ovdamearkan Juffá fearániid.

Ann-Helén Laestadiusa nuoraidgirji Dušše bijadit lea almmuhuvvon davvisámegillii jietnagirjin. Girji lea gehppes ja álkes lohkamuš. Dan sáhttá oastit girjegávppiid bokte.

Lukulumo -siidu lea rahpan buot iežas materiálaid, nu ahte daid sáhttá geavahit nuvttá. Siiddus leat davvi- ja máttasámegielat jietnagirjjit.

Sámegielat Daisy -jietnagirjjit leat oaivvilduvvon dušše olbmuide, geain lea lohkanváddu dahje juoga doaibmahehttehus. Daid lea ráhkadan Celia -guovddáš, mii buvttada girjjálašvuođa earret eará čalmmehemiide čuokkesčállagiin.

Sámegielat podkásttat

Sámegielat podkásttaid gávdná earret eará iešguđege sámerádio siidduid bokte prográmmaid, dego Anarâš saavah, Binna Bánna, Sohkaršohkka, Eallima mohkit, Gáfestallan Lisain dahje bálkkašuvvon Duohta Ivnnit.

Lassin sáhttá guldalit Sis-Finnmárkku syndroma, Anne Lene Turi Dimpas ja Ánne Márjá Guttorm Graven hálešteaba vuđoleappot servodatáššiid birra. Dan sáhttá guldalit ovdamearkan Spotifyi bokte.

Álgojagis Guovdageainnu lagašrádio lea buvttadan Sámegiella modeardna servodagas. Fáddán leat earret eará divttat, hip-hop, riektegiella, čállingiella, teáhtergiella ja maid sámi PitStop.

SuperSápmi podkásttas Áslat Holmberg ja Beaska Niillas ovttas gussiiguin dutket ja digaštallet čiekŋalit dehálaš servodatfáttáid.

Sámegielat mobiilaspealut

Dán áigge gávdnojit juo olu iešguđege lágan mobiilaspealut dihtoriid, jierbmetelefovnnaid ja tableahtaid várás. Muhtun spealut leat sámegillii dahje das lea sámi fáddá.

Sámedikki vuollái skuvlaahkásaččaid mánáidmateriálaprošeakta lea buvttadan guokte mobiilaspealu, Guovža ja Rieban ja Giellabeassi, maid sáhttá viežžat jierbmetelefovdnii ja speallat dihtorin nuvttá.

Norgga bealde Sámi lohkanguovddáš lea čohkken sámegielat spealuid listtuide, vai daid livčče álkit gávdnat. Oassi lea nuvttá ja oassi máksá.

Lávdespealut ja buđaldusat

Neahttamateriálaid lassin gávdnojit maid sámegielat lávde- dahje fiellospealut.

Muitospealuid lassin gávdnojit spealut dego Alias, Diehtoárran, Sámis Lotto, Sohkaspeallu ja Sátnebiŋgo. Go girjerájut leat gitta, de oasi sáhttá skáhput alcces tiŋgomin.

Kuáti -sámi árrabajásgeassima materiálabáŋkkus gávdnojit evttohusat ja rávvagat buđaldeapmái siste ja olgun, báberdohkkát, ivdnen- ja goarrungovat sihke lávde- ja muitospealut maid sáhttá čálihit.

Sullasaš evttohusaid gávdná Ovttas - Sámi oahpponeavvuid materiálabáŋkkus.

Mikä?

Poikkeustilanteessa saamenkieliset nettimateriaalit käyttöön

  • Digitaalisia materiaaleja on julkaistu inarin-, koltan- ja pohjoissaameksi, jotka sopivat kotiopetukseen. Eniten materiaaleja on pohjoissaameksi.  
  • Materiaaleja löytyy eri ikäisille lapsille ja koululaisille mutta myös aikuisille monilta eri nettisivuilta. 
  • Tarjolla on ääni- ja e-kirjoja, videoita, podcasteja, mobiili- ja lautapelejä sekä erilaisia askarteluehdotuksia.