Sá­me­gie­lat Mu­menvág­gi álgá 13.4. - Mu­mistá­lu jiet­na­neavttár lea Áilu Valle ja Unna Miáža neaktá Irene Länsman

Mumenáhči neaktá Mikkel Gaup, Mumeneatni neaktá Siri Broch Johansen, Snuokki neaktá Ásllat Paltto ja Unna Miáža neaktá Irene Länsman.
Mumenáhči neaktá Mikkel Gaup, Mumeneatni neaktá Siri Broch Johansen, Snuokki neaktá Ásllat Paltto ja Unna Miáža neaktá Irene Länsman.
Kuva: MOOMIN CHARACTERS / GUTSY ANIMATIONS

Yle davvisámegielat Mumenvággi lea oaidninláhkai 13.4. rájes davvisámegillii. Mumenvákki vuosttas badji álgá Yle TV2:žis ja Yle Areenas vuossárgga 13.4.

Mumenvákki jietnaneavttárin leat dovddus namat Suomas ja Norggas. Mumenstálu rollii njuikesta ráp-artista Áilu Valle.

– Lea dehálaš kulturdahku oažžut Mumenvággi-ráiddu fállun sámemánáide sin iežaset eatnigillii, Valle dadjá.

Mumenáhččái jienas luoiká Norgga beale neavttár Mikkel Gaup, gii lea dovddus earret eará Ofelaš -filmmas. Mumeneatni fas neaktá Norgga beale girječálli ja -neavttár Siri Broch Johansen.

– Lean ilus go lean ožžon addit jiena ja eallima davvisámegielat Mumenvággái. Dalle go nieidan lei uhcci, mii láviimet geahččat NRK Sámi Mumenráiddu. Mumeneatnis lei nu litna jietna, álot liekkus ja jeđđejeaddji. Lea hui somá, ahte beasan neaktit justa su, Broch Johansen dadjá.

Neavttáriin midjiide oahpes jienat

Mumrihkkan gullat musihkkár Niko Valkeapää. Doaimmaheaddji ja badjeolmmoš Aslak Paltto lea Snuoggi.

Unna Junnás oahpes neavttár Irene Länsman addá jienas Unna Miážii.

– Nu guhká go muittán, de mumenat leat álot leamašan. Mun gehččen mánnán ruoŧagielat mumeniid, ja mu máná guovttos geahčaiga suomagielat mumeniid. Boahtte áiggis mu áhkkubat gehččet mumeniid sámegillii, dat lea máilmme somá. In livčče goassige mánnán, dahje ollesolmmožinge, máhttán jurddašit, ahte muhtimin šaddá dat beaivi go mumenat hállet sámegiela.

Snuhrrenieidda rollas lea doaimmaheaddji Linda Tammela.

– Lei somá hilbošit ja čiŋadit Snuhrrenieidda juolgečikŋii ja geahččat máilmmi čuvgesrukses lásaid čađa. Ledjen nu rámis, go mu válljejedje rollii ja mus lea vejolašvuohta ovddidit ná fiinna ášši. Dál unna ristnieiddažan beassá rávásmit Mumeniiguin, geat hállet su eatnigiela ja das lean gal hui lihkolaš Tammela illuda.

Smávit rollaid jietnaneavttárat

Vuosttas bajis eará rollain leat Annukka Hirvasvuopio-Laiti (Mimmel), Anna Näkkäläjärvi-Länsman (Filijoŋká), Pentti Pieski (Bisamroahttu), Tuomo Huusko (Hemul), Anne Olli (Du-dikki), Suvi West (Emmá Teáhterroahttu), Inga Ravna-Pieski (Ninni) ja Pekka Aikio (Di-di-uu, Unna Gopmáš).

Aslak Palttos lea nubbi smávva rolla Miskán ja ráiddu jorgaleaddji Inger-Mari Aikio addá jiena Bolesii ja Hemul-siessái.

Mumenvággi dahkkojuvvo maid anáraš- ja nuortalašgillii

Giđdat 2020 Yle kanálain čájehuvvojit Mumenvákki vuosttas baji 13 oasi.

Maid ráiddu nubbi badji, mii dál lea oaidninláhkai suoma- ja ruoŧagillii Yle kanálain, dubbejuvvo sámegillii. Dalle dubbengiellan leat anáraš- ja nuortalašgiella.

Mumenvákki vuosttas bajis beassá oahpásnuvvat Mumenvákki oahpes ássiide ja lagašmeahci vehá apmasut figuvrraide. Muitalus láidesta geahčči čađa molsašuddi jagiáiggiid gitta ođđa dálvái.

Davvisámegillii Mumenvággi-ráiddu lea jorgalan Inger-Mari Aikio. Ráiddu lea bagadallan Susa Saukko. Neavttáriid skuvlemis lemaš mielde maiddái bagadalli Pauliina Feodoroff. Ráiddu lea buvttadan suopmelaš Gutsy Animations.

Mumenvággi Yle TV2:žis ja Yle Areenas 13.4. rájes vuossárggaid diibmu 8.25.

Mikä?

Muumipeikko puhuu jälleen saamea

Yle tuottama Muumilaakso sarja käänyy pohjoissaemeksi Mumenvággi.

Ensimmäisen kauden 13 jaksoa ovat pohjoissaameksi. Seuraava kausi on inarin- ja koltansaameksi.

Ensimmäisen kauden pääroolien ääninäyttelijänä Muumipeikkona Ailu Valle, Muumipappana Mikkel Gaup, Muumimammana Siri Broch Johansen, Nipsuna Aslak Paltto ja Pikky Myynä Irene Länsman.

Mumenvággi Yle TV2:lla ja Yle Areenassa 13.4. alkaen.