Kolumni
Tilaajille

Hunteerinki: Rasuaa vareksilla

Meile on alettu jo riskisti enemän ko kappahleen aikaa sitte opethaan, että kovvaa rasuaa, niinko voita ja muuta semmosta elukkaperästä rasuaa häätys varoa. Son kuulemi rohki vaaralista, kuiten  nuin pitemän pääle. Alkava poka verisuonet menehmään niin visthoon kunthoon, että sole tosikhaan! Pikkusen ennää lirisee verta semmosen kokkahreisen suoni-rievun lävitte. Juuri ja juuri  ihmisriepu henkitorheissaan pyssyy. Ja ko lääkäähriin  joutuu ja se tähelisemmin syynäthään verenjuoksu, se havathaan että vistolta näyttää. Suonet ouvvat ko net parisattaa vuotta vanhaat vesiröörit, jokka kaivethiin ylös Helsinkistä. Ei ollu poka kaksisen näköstä, ei vain!

Runsuja ja vihaneksia ja panaania ja satsuumia häätys syä. Kannaa ja kallaa kärryyttää aurinkonkukkaöljyssä ja sonninkylkeä häätys visusti varoa. Sitä ei sais ko kerran kuukautheen  syä, nuin terhveyen tähen. Pörsin tähen ei pysty niinkhään taahjaan. Ja kananmunat ov vissiin aivan mahoton riesa. Kolesteroolin ryökälehän son jokon kerrala vaaraksi. Mutta älä huoli. Sei poka riitäkhään, että olhaan huolissaan ihmisten kolesterolista ei vain!