Bál­va­lus man galgá máhttit dáhttut - Viežžá vaikko Oulu rájes


Dál go koronavirusa dagahan ráddjehusaid ložžejit, táksevuoddji Kari Guttorm vuordá ahte Kela sáhtut vehážiid mielde lassánit.
Dál go koronavirusa dagahan ráddjehusaid ložžejit, táksevuoddji Kari Guttorm vuordá ahte Kela sáhtut vehážiid mielde lassánit.
Kuva: Outi Paadar

Jos gártá geavahit táksesáhtu dearvvasvuođadili dahje heajos johtolatoktavuođaid dihte, daid dihte sáhttá oažžut Álbmotealáhuslágádusas (Kela) buhtadusa mátkkiid ovddas ja dalle sáhttá tiŋgot Kela sáhtu.

Pro Keskus -siiddu mielde dál leat čieža sámegielat táksevuoddji, geain sáhttá dáhttut dolvvodit ovdamearkan Lappi guovddášbuohcciviesus Roavvenjárggas.

Ii juohke sajes sámegielat táksevuoddjit

Anára guovllus leat golbma táksevuoddji ja Ohcejogas njealje. Eanodagas ja Vuohčus ii leat dál oktage.

–  Gáibideimmet ahte sámegielat táksevuddjiid namaid galgá bidjat oidnosii Pro Keskus -siidui, muitala Jouni Ilmari Jomppanen, gii lea vuodján guhká Kela vuojuid.

Sáhtašedjego eará guovllu táksevuoddjit veahkehit vaikko Eanodaga guovllu sámegielagiid?

–  Jos Eanodagas dáhtošedjege sámegielat táksesáhtu de mus ii gánnet Ohcejogas vuolgit, go Kela ii mávsse munnje Ohcejoga ja Eanodaga gaskka. Ii gánnet vaikko vel sáhtašiige, čilge Kari Guttorm.

Viežžá vaikko Oulus

Táksesáhtu sáhttá tiŋgot Pro Keskus bokte dahje njuolga sámegielat táksevuoddjis.

Jos sámeguovllu buohcci lea vaikko Oulu universitehta buohcceviesus divššus, de son sáhttá tiŋgot sámegielat tákse.

–  Haddi bissu seammán, iežas ovddasvástádus 25 euro ovtta guvlui.

Oppalaččat táksevuoddjit lohket ahte olbmot leat duđavaččat fálaldahkii.

50 mátkki mánus

Kela lea mieđihan sámeguovllus ássi sámegielagiidda fástatákseáššehasvuođa, mii vuođđuduvvá sámi giellaláhkii, iige sámegielat olmmoš dárbbaš ohcat dan sierra.

Kela fidne tiŋgojuvvon mátkkiid logus dieđuid njuolga Pro Keskusis.

–  Tiŋgojuvvon táksesáhtut leat sullii 50 mátkki mánotbajis.

Kela ii vurke sierra dáid sáhttodieđuid statistihkaid várás.

Eai váidagat Kelai

Dálá ortnet leamaš fámus 1.7.2018 rájes, nappo masá guokte jagi.

Mátkemearit molsašuddet nie, ahte dálvit leat eanet mátkkit ja geassit leat jaskadeabbo.

–  Midjiide eai leat boahtán áššehasaiguin makkárge váidagat, lohká Kela plánejeaddji Anne Hauta.

Álbmotealáhuslágádusa Lappi doaibmabáiki rávve ja oahpista geavahit maid sámegielat táksesáhttofálaldaga.

Dušše 20 proseantta báhcan

Go gulaskuddá sámegielat táksevuddjiin, de koronavirus lea čielgasit geahpedan vuojuid.

–  Koronaáigi váikkuha dieđus bálvalusaide ja danin Kela vuojut leat geahppánan. Dál vuoruhuvvojit dušše hohpolaš vuojuid.

Vuojuin gahččan olu eret.

–  Dál leat báhcán dušše 10-20 proseantta das mii leamaš ovdal koronaáiggi, šuohkiha okta táksevuoddji.

Dilli soaitá buorránit farga. Cuoŋománu loahpas guovddášbuohcciviessu dieđihii (23.4.) ahte áigot lasihit divššuid, de soitet sámeguovllu Kela sáhtut maid lassánit.

Mikä?

Saamenkieliset Kela kyydit

  • Kela on myöntänyt saamelaisalueella asuville saamenkielisille vakiotaksiasiakkuuden, joka perustuu saamen kielilakiin.
  • Pro Keskuksen nettisivujen mukaan löytyy seitsemän saamenkielistä liikennöitsijää.
  • Tilattuja matkoja on ollut normaalitilanteessa noin 50 matkaa kuukaudessa.