Suoma Sámi Nuorat -searvi (SSN) buvttii mánnodaga Ovttastuvvan Našuvnnaid álgoálbmotáššiid bissovaš foruma (UNPFII) čoakkámis New Yorkas ovdan fuolas das, got sámiid iešmearridanrievtti váilon váikkuha sámenuoraid dillái. Áššis muitala Yle Sápmi.
SSN celkkii, ahte go iešmearrideapmi váilu, nu sámenuorat leat behtton ja fuolas boahttevuođas.
SSN oainnu mielde ovdamearkka dihte almmolašvuhtii ovdanbuktojuvvon boasttodieđut sámiid birra ja sámiid negatiivvalaš gieđahallan medias ja ođđasiin bidjá ain lasi deattu sámenuoraid hárduid ala.
SSN lea maid fuolas gávpotsámenuorain, geat šaddet čiehkat sámevuođaset, go ballet fallehemiin.
- Sámenuorat gártet gillát garra streassas, go vigget seailluhit ja bealuštit iežaset kultuvrra, historjjá ja giela. Mannan jagi eamiálbmotáššiid erenomášraporterejeaddji giddii fuopmášumi sámeáššiide Suomas. Suoma stáhta rihkku ain eamiálbmotjulggaštusa paragráfaid 3, 8 ja 33 ja sápmelaččaid iešmearridanriekti ii ollašuva obanassiige, searvvi čálli Petra Laiti muitalii čoakkámii searvvi beales.
Suoma stáhta ii searvvi mielas doarjjo Sámi olggobealde orru sámenuoraid dárbahassii.
- Suoma stáhta ii beroš dán dilis, dat lea dušše lasihan eahpeluohttámuša sápmelaččaid ja suopmelaččaid gaskkas. Sámenuorain lea dakkár dovdu, dego sii livčče nuppi luohká olbmot, SSN muitalii sáhkavuorustis.
SSN mielas Suoma stáhta ii leat háliidan čoavdit čuolmmaid sámiiguin sámiid eavttuiguin.
Suoma Sámi Nuorat -searvi bovdiige álgoálbmotáššiid sierraraporterejeaddji Supmii oahpásmuvvat sápmelaččáid dillái buorebut.
- Mii sávvat, ahte erenomášraporterejeaddji dutká ain Suoma stáhta doaimmaid, danin go dilli vearrána olles áigge, Petra Laiti loahpahii SSN sáhkavuoru.
SSN huolissaan saamelaisnuorista
Suomen saamelaisnuorten järjesto SSN toi esille YK:n alkuperäiskansojen pysyvässä foorumissa (UNPFII) huolensa saamelaisten itsemääräämisoikeuden puuttumisen vaikutuksista saamelaisiin nuoriin.
- He joutuvat kärsimään kovasta stressistä, kun pyrkivät säilyttämään ja puolustamaan omaa kulttuuriaan, historiaansa ja kieltänsä, kertoi SSN:n puolesta puheen UNPFII:ssa pitänyt sihteeri Petra Laiti.