Yle Sápmi muitala, ahte Ohcejogas álbmot lea ortniiduvvame Deanu soahpamuša vuostá.
- Ohcejogas lea šaddamin álbmotlihkadus Deanu guolástannjuolggadus- ja soahpamuševttohusa vuostá, muitalii Ohcejoga gielddahoavda Vuokko Tieva-Niittyvuopio Yle Sápmái.
Soahpamušhápmosa sisdoalus ordnejuvvojit dieđáhus- ja ságastallandilálašvuođat Ohcejogas ja Gáregasnjárggas.
Ohcejoga Áilegasdálus ordnejuvvo dilálašvuohta duorastaga 7.7.2016 diibmu 16.00 ja Gáregasnjárgga Gilidállu Sáivus bearjadaga 8.7.2016 diibmu 16.00.
- Dilálašvuođas evttohusa birra addá dieđu ráđđádallangotti lahttun doaibman Anne Nuorgam ja báikki alde leat luohttámušolbmot Ohcejoga gieldda ovddasteaddjin, Tieva-Niittyvuopio muitalii Yle Sápmái.
Soahpamušhápmosis beassá vel cealkit ovdalgo dat manná riikkabeivviid dohkkeheapmái.
Deanu soahpamušhámus almmustahttojuvvui mannan vahkus.
Ođđa soahpamuša ulbmilin lea geahpedit goddon luosaid meari 30 proseanttain dálá dásis. Dán dihte bohtet ođđa ráddjehusat buot bivdovugiide.
Deanu soahpamuša Suoma ráđđádallangotti sápmelaš lahtut guđđe aktasaš sierraoaivila soahpamuššii. Sierraoaivila váldoágga lea, ahte ođđa bivdoráddjehusat rihkkot vuođđolága. Čuolbman vuolláičállit oidnet ee. oamastanrievtti geavtima-, sámekultuvrra hárjeheami- ja ealáhusrivttiid ráddjema.