Yle: Sá­me­gie­lat doaim­ma­hus buvt­ta­da árvvu ser­vo­dah­kii

Yle almmustahttii duvle ođđa strategiijas jahkái 2020. Dan temán lea Suopmelaččaid gaskas.

- Mii vástidit maid sámiid ja iežá vehádagaid buori bálvalusas, Yle lohpida.

Yle lea buvttadan maid raportta, man namma lea Journalismma boahtteáigi. Das leat máinnašumit sámiid birra.

Yle oaidná, ahte vehádatgielat doaimmahus buvttada árvvu suopmelaš servodahkii.

- Ovdamearkan ođđa čielgagielat ođđasat maid tv:s sáhttet doaibmat doarjjan sisfárrejeaddjiid ásaiduhttimis Supmii. Maid sámegiel doaimmahusa buvttadan ođđasat radioi, tv:i ja nehttii golmma sámegillii ja suomagillii rahpet máilmmi vehádaga geahččanguovllus. Ná vehádatgielat doaimmahus buvttada árvvu suopmelaš servodahkii, Yle raporttas čilgejuvvo.

Yle čatná Yle Sámi ja sámedikki doaimmaid oktii.

- Sámegielat bálvalus lea máilmmi dehalaš vehádatkultuvrra ja -giela seailuma dáfus, muhto maid ovdamearkan sámediggái laktaseaddji demokratiija doarjjan, Yle raporttas čállojuvvo.

- Sámegielat doaimmahusas lea iežas dehalaš bargu sámi identitehta ja sámegielaid nannejeaddjin ja ovddideaddjin dilis, mas sámegielat leat ealáskeamen ja sámi kultuvrras lea dáhpáhuvvan renesánsa.

Yle muittuha, ahte Yle Sápmi lea Suoma áidna sámegiel media, dannego sámegiel aviissat eai leat.

- Dušše Lapin Kansa- ja Enontekiön Sanomat -aviissat almmuhit ođđasiid davvisámegillii oassin suomagiel aviissaid, Yle diehtá.

Yle jelgii sámegielat olbmot ohcet ođđasiid eanaš interneahtas, radio guldaluvvo sámegielaid dihte ja tv:s vurdet vásáhusaid.

Sámegielat sisdoaluid ovddideamis lea deaddu neahtas.

- Boahtteáiggi sámegiel geahččit ja guldaleaddjit, mánát ja nuorat, leat jo dál neahtas. Dálá sámegiel doaimmahus lea huksejuvvon guovloradio ja davviriikalaš tv-ovttasbarggu vuođul. Sámegiel sisdoalut galget ovdánit erenoamažit interneahtas. Interneahtas unnage publikummaid sáhttá bálvalit bures, muhto golut eai loktan stuorrán.

Nubbin hástalussan Yle raporttas namuhuvvojit gávpotsámit.