WWF ja Meahciráđđehusa luonddubálvalus ordnejit ovttasbarganleairra Ohcejoga Jeagelveaji sámedálus dán mánu maŋemuš vahkus. Leairra áigge váldodeaddu lea šillju divrras kulturbirrasa áimmahuššamis. Luonddubálvalus joatká dán jagi maid Jeagelveaji visttiid ortnegisdoallama, mas leairalaččat leat veahkkin.
- Jeagelveaji sámedállu lea riikkadásis mearkkašahtti oppalašvuohta, mas seammá šilljui gullet boares visttit, kultureatnamat ja dološmuitosajit. Jeagelveaji divrras gieddi lea ovdal báhcan measta fuolahusa haga ja danin dat lea miesttaluvván, muitala Meahciráđđehus.
Meahciráđđehus muitala, ahte WWF:a ovttasbarganleairra áigge gieddi njáskojuvvo nu ahte šaddá rabas nugo ovdalaš áiggiid leamaš. Giettis šaddet áitojuvvon márjjáčoavdagat ja davverásselávki, maid seailun gáibida gietti láddjema jeavddalaččat.
- Ollásii goalmmátoassi Suoma áitojuvvon šlájain šaddá kultureatnamiin, mat leat šaddan dološ eanageavahanvugiid čuovvumuššan. Lihkus dáid áitojuvvon šlájaid sáhttá gádjut ovttasbargoleairrain. Ná konkrehtalaš luonddusuodjalanbargu bálkkaša, dadjá WWF:a suodjalanáššedovdi Matti Ovaska.
WWF:a ovttasbargoleairra olbmot oassálastet ovttasbargovahkus visttiid ortnegisdoallamii nu ahte bihkkadit gáhtuid ja huksejit muoras sávzaáiddi.
- Lea plánejuvvon, ahte boahttevuođas sávzzat dollet gietti ortnegis ja ealáskahttet dálu. Jurdda sávzaguođohanvahkuin bođii guovllu olbmuin, muitala Meahciráđđehus.
Gáldun: Meaciráđđehus