Riikkabeivviid vuođđoláhkaváljagoddi guossástallá Anáris 26.-27.04.2016.
Vuođđoláhkaváljagotti čálli, váljagodderáđđeolmmoš Matti Marttunen muitala LK Ságaide, ahte vuosttaš guossástallanbeaivve áigge váljagottis lea ulbmilin deaivát sámedikki ovddasteddjiid ja dan maŋŋel seammá beaivve váljagoddi ordne rabas ságastallandilálašvuođa Sajosis.
Son muitala, ahte sihke ságastallandilálašvuođa ja olles mátkki temán leat Davviriikkalaš Sámesoahpamuš, ILO 169 -soahpamuš ja dasa lassin maid iežá ovdanboahtti áššit. Nuppi beaivve áigge vuođđoláhkaváljagoddi guossástallá sámemusea Siiddas ja gullá dutkiid oainnuid sámeáššiin.
- Váljagoddi gullá dutkiid Leena Heinämäki , Antti Aikio , Anne Nuorgam , Erika Sarivaara , Tanja Joona ja Juha Joona sihke rektor Liisa Holmberg . Leat geahččalan oažžut muhtinlágan balánsa dasa geaid váljagoddi gullá, danin go leat ipmirdan, ahte sin dutkamušaid gaskas leat sierralágan oahpporuossalašvuođat, muitala Marttunen.
Mátkái vulget 12 riikkabeaiáirrassa, váljagodderáđđeolmmoš ja riekteministeriija demokratiija- ja giellaáššiid ossodaga hoavda Johanna Suurpää . Váljagoddi guossástalai maŋemusat sámeguovllus Eanodagas giđđat 2013.
- Oassi váljagotti lahtuin leat ođđa lahtut ja sinjesiidda dát sáhttet leat ođđa áššit. Nuppedáfus vuođđoláhkaváljagotti ii olus dieđe maid ráđđehus bargá ja dan dihte omd. davviriikkalaš sámesoahpamuš sáhttá leat muhtin veardde amas ášši muhtumiidda daningo dat ii leat vel boahtán riikkabeivviide, dadjá Marttunen.