Riekteministeriija ilmmuhii duorastaga čielggadeami, mii lea dahkkon vaššiságain ja daid váikkuhusain vehádatjoavkkuide Suomas. Čielggadeapmi čájeha, ahte maid sámit vásihit vaššiságaid. Čielggadeami riekteministeriijai lea bargan Owal Group -nammasaš fitnodat. Čielggadeapmi lea čohkkejuvvon čakčat 2015 dahkkon rabas jearahallamis, masa vástide sullii 1 500 olbmo, main 62 ledje sámit. Čiežas dain sámiin jearahallojuvvoje persovnnalaččat. Jearahallamiidda leat bastán oassálastit buohkat geat leat ilmmuhan iežaset sápmelažžan.
- Jearahallamii ilmmuhan olbmot leat ieš meroštallan iežaset sápmelažžan. Mii eat leat dan dárkkistan ášši mainnagelágiin, muitala dutki Laura Jauhola Owal Group -fitnodagas.
Čielggadeapmái vástidan sámit leat vásihan vaššiságaid eanemusat interneahtas. Sámit leat vásihan vaššiságaid sihke váldo- ja sámeservodagas. Váldoservodagas boahtti vaššiságat láktasit dávjá politihkkii ja sámiid rivttiide. Sámeservodaga siskkáldas vaššiságat vuohon laktásit dávjá olbmo sápmelaš identitehta dovddasteapmái (ee. sámedikki beales) ja sáhttet oidnot maid sámejoavkkuid gaskkas bilkideapmin.
- Jearahallamii searvan olbmot leat ieža buktán daid áššiid ovdan, mii eat leat dasa váikkuhan. Maid sierra sámejoavkkuid leat olbmot ieža meroštallan, muitala Jauhola.
Jauhola muitala, ahte rabas jearahallama birra lea dieđihuvvon ee. sámediggái ja servviide.
Čielggadeapmi gávdno riekteministeriija siidduin: http://www.oikeusministerio.fi/fi/index/julkaisut/julkaisuarkisto/1456826655763/Files/OMSO_7_2016_VIPU-raportti_158_s.pdf