Sámediggi válljii disdaga dollon dievasčoakkámis sihke áirasiid válgalávdegoddái ja evttohii ovddasteddjiid meahciráđđehuslágas ásahuvvon sámi ruovttoguovllu gielddaid ráđđádallangottiide.
Sámedikki válgalávdegotti ságadoallin válljejuvvui Janne Näkkäläjärvi Eanodagas (várrelahttun Inker-Anne Magga ) ja iežá lahttun Jouni Aikio (Haikonen) Anáris (várrelahttun Johanna Alatorvinen ), Veikko Feodoroff Anáris (várrelahttun Tauno Haltta ), Birit-Anni Magga Soađegilis (várrelahttun Jouko Hetta ) ja Inga Guttorm (Oaptii-Iŋgá) Ohcejogas (várrelahttun Aslak Pieski ).
Näkkäläjärvi lei ságadoallin maid mannan válgabaji válgalávdegottis ja dušše várrelahttu Pieski lea ođđa lahttu mannan válgabaji válgalávdegotti ektui.
Sámediggi dagai evttohusaid eanan- ja meahccedoalloministeriijai meahciráđđehuslagas ásahuvvon sámi ruovttoguovllu gielddaid ráđđádallangottiide.
Eanodaga ráđđádallangoddái evttohuvvui ságadoallin Ulla-Maarit Magga ja várrelahttun Juha Magga . Nubbi ovddasteaddjin evttohuvvui Tuomas S. Palojärvi ja su várrelahttun Berit Siilasjoki. Ohcejoga ráđđádallangoddái evttohuvvui ságadoallin Anne Nuorgam ja várrelahttun Inka Länsman . Nubbi ovddasteaddjin evttohuvvui Aslak Holmberg ja su várrelahttun Nilla Tapiola. Anára ráđđádallangoddái ovddasteaddjin evttohuvvui Heikki Paltto ja su várrelahttun Kirsti Kustula .