Deanu luossageassi leamašan viehka fuotni dássážii. Seammá duođaštii maiddái lávvardaga Ohcejoga luossariemuid sálaš. 134 gilvvohalli godde čieža diimmu bistán gilvvus dušše 11 guoli, luosjulggiid ja dittiid ja dušše ovtta badjel 7-kilosačča.
Vuoitiguoktá luossa dettii 7,278 kilo. Soai leaba Tero Ronkainen ja Teija Savilahti . Nubbin gilvvus leaigga ohcejohkalaš Jarmo Helander ja oululaš Harri Halonen 6,953-kilosaš luosain. Goalmmádin fas Reijo Hautalahti, Tamperes eret, su luossa dettii, 5,048 kilo.
Tero Ronkainen ja Teija Savilahti gottiiba luosa gilvvuid gaskkamuttus Goržámis. Luossa dohppii oliivaruoná dolgevuggii.
- Luossageassi leamašan mu bokte buorre ja dát vuoitu vel vuolláisárggastii dan. Godden 6-kilosačča ovddit beaivve dego gilvvuide hárjehallamis, son muitala.
Luossariemuid vuoiti beassá válljet bálkkašupmin juogo deanufatnasa dahje 8-heastafámu fanasmohtora. Vuoitiguoktá eaba dárbbaš smiehttat goappá válljeba.
- Japánas ráhkadit fanasmohtoriid ijaid beivviid ja máilmmis lea dušše okta Ánot-Hánssa Eino (Laiti), guhte duddjo albma deanufatnasiid, nuba fanas vuolgá fárrui, Ronkainen láhttesta.
Iŋggá-Per Jovnna , Jouni Paltto (77) lea leamašan mielde measta juohke gilvvus, gitta vuosttamuš gilvvu rájes.
- Muhto dán gilvvu in leat gal lihkostuvvan vuoitit, vaikke guliid gal lean goddán dáid gilvvuin, dálge mus ledje guokte ditti gitta, muhto eai bisson. Oalle váttis lei maiddái suhkat okto, go nu garrasit biekkai miehterávnnji guvlui, Jovnna muitala. Sutnje dát Ohcejot’njálmmi goappáge beale báikkit leat oahppásat, vaikke almmái ássá Badje-Deanus Savvona gilis.
- Mun lean leamašan sulaid 30 jagi Šleađgaoasusgottis barggus ja vahkuid ássan kirkosiiddas, Jovnna máinnaša.
Deanu luossagonagasgilvvut ledje mannan lávvardaga 35. geardde. Vuosttas gilvu lei 1981, dan vuittii Ivvár-Ovllá Pieski.
Dáhpáhusbáiki Gieddesavvona dearpmi alde lei ráhkaduvvon sámegillin ja doppe ledje somás márkanat, ja olbmuide máŋggalágan gilvvut ja herskot borran láhkai. Dearpmi alde ledje mealgat olbmot, kánske sotnabeaivvi Guttorm-soga deaivvadeapmi maiddái lei geasuhan olbmuid čuovvut luossagilvvuid ja deaivat oahpes olbmuid.
Deanu luossagonagasgilvu
1. Saviranta Teija, Sirkka / Ronkainen Tero, Ohcejohka 7,278
2. Helander Jarmo, Ohcejohka / Halonen Harri, Oulu 6,953
3. Hautalahti Reijo, Tampere 5,048
4. Pakkala Tuija, Toivala / Hoffren Janne, Toivala 4,861
5. Mattila Aarre, Ohcejohka / Kellokumpu Ari, Salla 4,027
6. Tapiola Raine, Ohcejohka / Tapiola Johan Uula, Ohcejohka 3,690
7. Ryynänen Teemu, Maaninka/ Ruotsalainen Tuomo, Iisalmi 3,216
8. Järvensivu Aslak, Ohcejohka / Ojala Markku, Sievi 1,690
9. Leppänen Kaarlo Kaavi 1,514
10. Niskanen Pekka, Kuopio / Karjalainen Tuomo, Ohcejohka 1,365
11. Määttä Marjatta, Peräposio / Määttä Tapio, Peräposio 0,975