Dán vahkuloahpa dollojuvvojit Tankavári gollegilis, mii lea sullii 10 kilomehtera davás Vuohčus, Taigafestivála, Mánáid lávvordat ja njoarostangilvu.
Taigafestiválas bearjadaga diibmu 21 rájes lea sámemusihka eahket, mas čuojahit Tiina Aikio ja Tony Brantberg , Ravggon ja Out of The Woods. Lávvordaga diibmu 21 rájes festiválas čuojahuvvo vuohon rock-musihkka.
Njoarostangilvu dollojuvvo 9.–10.7. Njoarostangilvvu oaivebálkkašupmin lea dánge jagi njealjejuvllat (mönkijä).
Diimmá njoarostangilvvu vuittii Norgga beale sápmelaš Nils Máhtte Eira .
Festivála neahttasiiddus muitalit, ahte vuosttaš beaivvi leat rátkkagilvvohallamat. Dalle gilvvohallit njoarostit moala, mii lihkada. Finálas njoarostit bárralagaid “gahčahangilvvus". Gilvvohallamiid ordnejeaddji háhká suohpaniid. Buohkat njoarostit seammalágan suohpaniin. Suohpanat leat ordnejeaddji čujuhan sajis ja doppe gilvvohalli oažžu válljet suohpana ovdal iežas njoarostanvuoru.
Njoarostangilvu leat gehččiide nuvttá. Dasa lassin mánáid lávvordat, mii ordnejuvvo diibmu 12–17, lea maid nuvttá.
Mánáid lávvordaga leat prográmmas ee. Timo Taikuri (diidaolmmái), njuikunšloahtta, njálgguskanovdna, Onnen lähettiläs (Lihku ofelaš) -čájálmas ja buđaldallanbargobádji.
Lávvordaga ordnejuvvojit maiddái geassemárkanat main leat ovdan ee. giehtaduojit.
Gáldun: taigafestival.fi