Ruoŧa stáhta lea guođđán Girjás-áššis loahpalaš 40-siidosaš váidalusa hoavvariektái, muitala SVT Sápmi. Stáhta čuoččuha ain, ahte dat lea eananoamasteaddji ja das lea aktoriekti guolásteapmái ja meahcasteapmái Girjása guovllus.
Stáhta ovddasteaddji Anna Skarhed mielas ášši lea mohkkás ja dan lea váttis čilget oanehaččat.
- Dás leat máŋga ášši maid ferte mannat čađa, dadjá Skarhed.
Stáhta mielas Váhčira diggerievtti mearrádus spiehkasta das got sámiid eanaoamastus lea ovdal árvvoštallon duopmostuoluin ee. jagi 1981 Vearroduottaráššis. Dasa lassin stáhta mielas duomus lea prinsihpalaš mearkkašupmi, dannego iežátge čearut sáhttet álgit gearregastit eananáššiin.
Girjása ovdaolmmoš Matti Berg imaštallá stáhta váidalusa.
- In ipmir, ahte maid dainna geahččalit. Orro dego das livččii politihkken duogin, dadjá Berg.
Váhčira diggerievtti álgojagis addán duomu jelgii Girjása olbmuin lea aktoriekti meahcástit ja guolástit čearu eatnamiin.
Loga SVT Sámi sága ruoŧagillii dáppe: http://sverigesradio.se/sida/artikel.aspx?programid=2327&artikel=6443419