Suoma vuođđo- ja olmmošriekteprográmma válbmen lea álgime. Riikkabeaivvit leat gáibidan, ahte Suopma galgá mearridit maid áššiid Suopma deattuha vuođđo- ja olmmošriektepolitihkas dán ráđđehusbajis.
Suoma riikkabeaivvit gáibidedje jagis 2014, ahte čuovvovaš stáhtaráđđi bargá vuođđo- ja olmmošriekteprográmma. Mihttomearrin galgá leat doaibmaprográmma, mii ovddida vuođđo- ja olmmošrivttiid. Barggu čađaha stáhtaráđi fierpmádat, man riekteministeriija jođiha. Fierpmádaga ságadoallin lea riekteministeriija giella- ja demokratiijaáššiid ovttadaga jođiheaddji Johanna Suurpää. - Doaibmaprográmma ulbmilin lea mearridit maid Suopma deattuha vuođđo- ja olmmošriektepolitihkas dán ráđđehusbajis. Mii bidjat konkrehtalaš mihttomeriid ja doaibmabijuid vai bastit ovddidit vuođđo- ja olmmošrivttiid ollašuhttima iešguđet hálddahussurggiin, Suurpää muitala.
Vuosttas dilálašvuohta lea odne Säätytalos. Dan ordnejit stáhtaráđi fierpmádat ja Olmmošriekteguovddáš ja mihtomearrin lea gullat iešguđet oainnuid áššis. Maid sámedikki ságadoalli Tiina Sanila-Aikio doallá sáhkavuoru.