Suoma fuođđoguovddáš muitala, ahte dat lea mieđihan Lappii boahtte čavčča sarvvabivdui 6 676 bivdolobi. Lohpemearri lassánii badjel 20 %:ain ovddit jagi 5 472 bivdolobi ektui.
Čavčča 2016 meahcástanbadjái mieđihuvvon bivdolobiid vuođđun leat Lappi guovllu fuođđoráđi mearridan dávjodatulbmilat, maid fuođđoráđđi bijai giđđat 2015 Lappi ovcci sarvadoalloguovllu sarvanállái. Ulbmilat leat biddjon sarvadoalloguovlluid mielde ja dat leat fámus golbma jagi. Ulbmilmearit sarvvaid náli sturrodahkii leat unnimusat Davvi-Sámis ja alimusat Lulli-Lappis. Mannán meahcástanbaji maŋŋel buot guovlluin bisso sarvvaid dálvenális biddjojuvvon ulbmiliid siste. Bivdolobiid vuođul lea vejolaš beassat badjel 8000 sarvva sállašii. Ovddit meahcástanbajis Lappis bivde 6186 sarvva.
Luondduriggodatguovddáža árvvoštallama mielde Lappi sarvanálli lea leamašan oalle stáđis jagi 2011 rájes. Dien áigodagas dálvenálli lea molsašuddan 15 700–16 700 ealgga gaskkas. Mieđihuvvon sarvalohpemeriin geahččalit doallat sarvvaid dagahan vahágiid govttolaš dásis, váldit vuhtii guovlluid earenoamášvuođaid sarvanáli dikšumis ja seailluhit sarvanáli eallin ja dakkárin, ahte bivdu lea vejolaš.
Sarvvabivdu álgá čakčamánu maŋimuš lávvordaga čakčamánu 24. beaivve, spiehkastahkan leat áraduvvon sarvvabivdoguovllut Eanodat, Anár, Muoná ja Ohcejohka, gos sarvvabivdu álgá juo čakčamánu 1. beaivve.
Gáldun: Suoma fuođđoguovddáš