Anonyma dáiddárkollektiiva Suohpanterror oaččui dán jagáš Kritiikin Kannukset -bálkkašumi. Bálkkašumi mieđihii gaskavahku Suomen arvostelijain liitto ry. (SARV). Bálkkašupmi juhkkojuvvo jahkásaččat dáiddárii dehe dáiddárjovkui ánssolaš dagus muhtun dáidaga suorggis. Dat addojuvvo dovddastussan eandalii nuorra dáiddáriidda ee. jagi áigge dáhpáhuvvan johtilis ovdáneamis.
- Jagi 2012 rájes doaibman sámedáiddáriid joavku lea njuiken oanehis áiggis stuora álbmoga diđolašvuhtii ja dáiddamáilmmi árvvusadnon doaibmin. Joavku atná ávkin dáidaga giela bastilit ja čehpet. Suohpanterror čujuha sámekultuvrii ja dan ovdii dahkkon aktivismii. Joavkku plakáhtadáidagis dokumentára fáttáide ovttastuvvet dáidaga historjjá ikonat ja populárakultuvrra govat. Plakáhtat govvejit beaktilit sámiid sajádaga dálá-Sámis, muitala SARV dieđáhusastis.
Suohpanterror-joavku gidde fuomášumi sámiid sajádahkii ee. plakáhtadáidaga ja performánssa vugiiguin. Suohpanterror lea kritiseren ee. Sámi luondduresurssaid- ja sámekultuvrra rivvema ja dan, ahte sámiid oainnut eai leat váldojuvvon vuhtii politihkalaš mearrádusaid dahkamis. Joavku lea cuiggodan Suoma stáhta earenomážit das, go dat ii leat ratifiseren ILO 169 -soahpamuša.
- Joavkku earenoamáš ánssuide gullá almmolaš saji innovatiivvalaš ávkkástallan. Dat lea atnán ávkin čehpet eandalii interneahta ja sosiála media dáidaga arenan, muitala SARV.