Skábmagovaid mánáidbeaivi ordnejuvvo duorastaga Sajosis. Prográmmas leat filmmat, bargobájit ja livemusihka vuolladásse- ja mánáidgárdeahkásaš mánáide. Prográmma álgá diibmu 9.00 ja bargobájit diibmu 10.00.
- Mánáid-tv Unna Junná doallá mánáidbeaivvis bargobáji ja olles filbmačájáhusa. Unna Junná -filbmačájáhusas lea maid livemusihkka, go Unna Junná ovdalas láidesteaddji Anna Näkkäläjärvi-Länsman boahtá lávlut Unna Junnái dahkkon musihka, čállá Skábmagovat dieđáhusastis.
Mánáidbeaivvis čájehuvvojit Ima hutkosat -musihkkavideot sihke filmmat ja videot maid mánát leat ieža bargan. Dasa lassin čájehuvvojit maid Norgga ja Ruoŧa mánáid-tv buktagat.
Bargobájiid temán lea filmmaid jietnamáilbmi ja filbmatraileriid dahkan. Niki Rasmus láidesta jietna- ja musihkkabargobáji ja Martta Alajärvi trailerbargobáji.
Nuoraidbeaivi dollojuvvo duorastaga Siidas diibmu 10.00. Dat lea oaivvilduvvon badjedásse- ja logahatahkásaš nuoraide.
Nuoraidbeaivvis čájehuvvo Inger-Mari Aikio filmma AMOC – Vuosmuš, mii muitala anárašráppár Amoc birra. Amoc dehege Mikkal Morottaja lea maid ieš báikki nalde ráppeme.
Iežá filmmat leat Ville-Riiko Fofonoff bagadallan Hangover Sápmi ja Elle Márjá Eira bagadallan Iđitsilba.
Nuoraidbeaivvi bargobádji gieđahallá still-govaid govvema. Dan doallá govvejeaddji Tarmo Lehtosalo.
