Suoma oaiveminister Juha Sipilä (guovd) guossástalai lávvordaga Avvilis oassin iežas Lappi turnea.
Sámedikki ságadoalli Tiina Sanila-Aikio geigii Sipiläi Avvilis vuot ovtta ávžžuhusa sámin. Dán háve ávžžuhusa leat čállán ovttas Suoma Sámediggi, Sámiráđđi, 12 sámesearvvi ja buot 13 sámeguovllu bálgesa.
- Mii vuolláičállit ávžžuhit oaiveminister Sipilä ja Suoma ráđđehusa ovddidit sámekultuvrra suoji ja dorvvastit sámekultuvrra hárjehaneavttuid. Dan ráđđehus sáhttá dahkat nu, ahte addá riikkabeivviide ráđđehusa evttohusa meahciráđđehuslága nuppástuhtimis dáid osiid ektui, Sanila-Aikio muitala Sámedikki dieđáhusas.
Vuolláičálliid jelgii sámečuoggáid galgá máhcahit meahciráđđehusláhkii dorvvastan dihte sámekultuvrra hárjeheami eavttuid.
Sii gáibidit maid, ahte ráđđehus fuolaha das, ahte sámeguovllu stáhta eatnamiin ii sáhte gáibidit eanet ekonomalaš vuoittu. Goalmmát áššin sii gáibidit, ahte sámeguovllu stáhta eatnamiid galgá sirdit ollásit almmolaš balánsii, daningo nu sáhttá dorvvastit dan, ahte dáid guovlluid servodatgeatnegasvuođat ollašuvvet.
Ávžžuhusa leat vuolláičállán Sámediggi, Sámiráđđi, Mii-searvi, City-Sámit, Suoma Sámiid Guovddášsearvi, Sámi Soster, Suoma Boazosámit, Oulu Sámit, Suoma Sámi Nuorat, Sámi Duodji, Johtti Sápmelaččat, Saa’mi Nue’tt, Sámi Siida, Vuohču sámiid searvi ja dát bálgesat: Bátneduottar, Lappi, Muttošjávri, Avvil, Njávdán, Neakkel, Sállevárri, Galddoaivi, Muotkeduottar, Báhčaveaijohka, Váhčir, Báišduottar ja Giehtaruohtas.
Maŋimuš vahkuid áigge ráđđehussii leat sádden ávžžuhusaid meahciráđđehuslága birra ee. Suoma Sámediggi, sámeguovllu bálgesat ja SSG.
Riikkabeaivvit dohkkehe bearjadaga meahciráđđehuslága sisdoalu. Áššis jienastuvvui, muhto dan bokte eai bastán máhcahit sámečuoggáid. Jienasteapmi lága loahpalaš dohkkeheamis lea beassážiid maŋŋel.
Vetoomus Sipilälle
Pääministeri Juha Sipilä sai Lapin-vierailunsa yhteydessä vielä yhden vetoomuksen metsähallituslaista. Saamelaiskäräjät, Saamelaisneuvosto, 12 saamelaisyhdistystä ja kaikki 13 saamelaisalueen paliskuntaa vetoavat Sipilään, jotta metsähallituslakia täydennettäisiin. Allekirjoittajat vaativat lakiin saamelaispykäliä, ettei saamelaisalueen valtionmaille tule suurempia tuottovaatimuksia ja että maat siirrettäisiin julkisten hallintotehtävien taseeseen.