Anára Sámemusea Siida ordne huksenárbbi rávvenbeaivvi gaskavahku čakčamánu 14. beaivve diibmu 16.30-18.30. Dáhpáhusa ulbmilin lea movttiidahttit boares visttiid oamasteddjiid divvunbargguide.
Dilálašvuođa álggaha Siidda auditorias restaurerenmeašttir Marko Korkeasalo ja son muitala divvunbargguin.
- Dan maŋŋá mannat olgomuseai, gos beassá oahpásmuvvat huksenárbbi dikšumii ovdamearkkaid bokte. Olgomuseas leat dál divvumin Itnetvári boarrásut stobu. Stobu bokte oahpásmuvvat dábálaš čuolmmaide, mat hirsastobuin lávejit leat. Boađe geahččat, makkár čovdosiid mii leat Itnetvári stobus válljen. Dus lea dál earenoamáš buorre vejolašvuohta beassat oaidnit, mo árbevirolaš muldebeaŋka ráhkaduvvo, čállá Sámemusea Siida neahttasiidduinis.
Dáhpáhusas muitalit maid huksenárbbi divššu veahkkeruđain.
- EJB-guovddážiid veahkkeruđat huksenárbbi dikšumii leat dárkkuhuvvon lagamusat dakkár divvunbargguide, mat seailluhit vistti earenoamáš iešvuođaid. Musealágádusa ovddeštanveahkkeruđat addojuvvojit riikkaviidosaččat mearkkašahtti visttiid restaurerenbargguide, čállá Sámemusea Siida neahttasiidduinis.
Siidda huksenárbbi rávvenbeaivi gullá Eurohpá kulturbirasbeivviid dáhpáhusaide. Beivviid ulbmilin lea movttiidahttit olbmuid doaibmat iežaset kulturbirrasa ja -árbbi seailluheami ja buori divššu beales. Ulbmilin lea maid lasihit olbmuid ipmárdusa kulturbirrasis ja árvvus adnit dan.