Sámi Árvvut -searvi muitala, ahte birasministeriija lea álggahan Suoma luonddutiippaid uhkivulošvuođa árvvoštallama. Searvi muitala dieđáhusastis, ahte dán bargui oassálastet badjel 100 dutki ja eiseválddi ja bargu galgá válbmanit jagi 2018 áigge.
Sámi Árvvut -searvi gáibida, ahte bargui váldojuvvojit mielde sámi árbevirolaš dieđu hálddašeaddjit ja sámi árbevirolaš dieđu dieđalaš áššedovdamuš. Uhkivulošvuođa árvvoštallan vuođđuduvvá dihto oasi mielde biodiversiteahttasoahpamuša geatnegasvuođaide.
Searvvi jelgii soahpamuša biologalaš geatnegasvuođaid lassin galgá dorvvastuvvot árbevirolaš dieđu ja suvdilis anu ollašuhttin sihke sámiid álgoálbmotrivttiid gudnejahttin.
- Uhkivulošvuođa árvvoštallan lea dieđalaččat ja politihkalaččat dehálaš árvvoštallan, daningo dat buvttada syntesa Suoma luonddu dilis ja lea vuođđun politihkalaš prográmmaide ja mearrádusdahkamii. Dán rádjái uhkivulošvuođa árvvoštallan lea dahkkon luonddudiehtagiid vuolggasajis, muitala searvi.
Sámi Árvvut -searvi deattuha, ahte lea vealtameahttun, ahte suodjaleapmi dáhpáhuvalii rásseruohtasdásis bajásguvlui.
- Árbevirolaš dieđu ja kulturdiehtagiid váldin mielde nannoseappot uhkivulošvuođa ráhkadeamis sáhttá doarjut mearkkašahtti ládje uhkivulošvuođa árvvoštallama dieđalaš sisdoalu meroštallama ja bohtosiid servodatlaš dohkkehahttivuođa ja váikkuhanvuođa, oaivvilda searvi.