Sámi Árvvut -searvi muitala dieđáhusastis, ahte dat lea ožžon Gaska-Suoma ealáhus-, johtolat- ja birasguovddážis (ELY) áigemearrái 2016-2017 ruhtadeami 15 000 euro árbevirolaš dieđu ofelačča dahkamii. Searvi muitala, ahte dat geavtá ofelačča dahkamii dasa lassin 1000 euro iežas ruhtaváriid. Searvvi ulbmilin lea oažžut ofelačča válmmasin jagi 2018 áigge. Ofelaš lea sihke dávvisáme- ja suomagillii.
- Ofelaš fállá vejolašvuođa buktit sisdoalu sámi kultuvrra mielde earenoamážit birasdieđu oahpahussii. Fidnu vuojulduvvá sámiid luonddu máŋggahápmásašvuođa árbevirolaš dihtui ja sámi luonddu gaskavuođa oahpahussii. Ofelaš sáhttá heivehuvvot árašaddadeamis vuođđoskuvlii bagadallojuvvon oahpahusas sihke mánáid ja nuoraid eaktodáhtolaš oahppamis, muitala Sámi Árvvut - searvi dieđáhusastis.
Searvi muitala, ahte dat lea vuođđudan fidnui stivrenjoavkku, masa gullet sápmelaš oahpaheaddjit ja árbevirolaš dieđu hálddašeaddjit.
- Fidnus barget veahkkebargit jagiid 2016 ja 2017. Fidnu ovdáneami mielde searvi gullá ofelaččas sierra sámi árbevirolaš dieđu hálddašeddjiid, oahpaheddjiid ja geavaheddjiid, muitala searvi.
Sámi Árvvut -searvi muitala dasa lassin, ahte dat ii čoakke ofelaččain iige dan vuovdimiin ruhtadeami iežas doaimma várás.
Searvi muitala maid, ahte dat áigu mieđihit sámi árbevirolaš dieđu bálkkašumi ramádatvahkuid áigge.