Historjjá goalmmát Sápmi Pride -dáhpáhus ordnejuvvui vahkuloahpa Guovdageainnus Norgga Sámis. Sápmi Pride -dáhpáhusa aktavuođas vuođđuduvvui ođđa sámi HLBTIQ-olbmuid searvi, man namma lea Gabba.
- Gabba lea min mielas fiidnámus boazu ja ealus eará bohccot givssidit dan, nu namas lea vehá symbolihkka. Bonjut leat ovdal olu givssiduvvon, muhto dáppe Guovdageainnus gal lea leamašan buorre leat dán vahkuloahpa, muitala searvvi ságadoallin válljejuvvon Dávvet Bruun-Solbakk.
HLBTIQ dárkkuha homo-, lesbo-, bi-, trans-, inter- ja queer-olbmuid. Searvi geavtá ieš HLBTIQ-olbmuin sámegiel sáni bonju. Gabba-searvi vuođđuduvvui danne, go Queer Sámit -searvi heaittihuvvui geasset.
- Ulbmilin lea bargat sámi bonjuid ovddas ja ovddidit sámi bonjuid áššiid. Searvvi doaibma galgá leat čorgat ja dat galgá oažžut buriid rutiinnaid vuođđun. Mii geahččalit bargat, ahte searvi sáhttá bistit guhkit áiggi, muitala Bruun-Solbakk.
Bruun-Solbakk lei duđavaš dasa mo Guovdageaidnu válddii vuostá Pride-doaluid, muhto oaidná, ahte sámi searvvuš ferte vel bargat eanet seksuálalaš utnolašvuođa ovdii.
- Dát lea leamašan badjel buot mu vuordámušaid, go nu olu olbmot leat searvan ja leamašan hirbmat somá. Dan ovdii, maid mii leat bargan maŋemus guokte mánu, lea somá oaidnit ja vásihit dan. Sámi servodat ferte goitge vel bargat dainna dan ovdii, ahte olbmot sáhttet dovdat oadjebassan leat juste dakkárat mat leat ja ahte mis lea rahpasut servodat ja mas buohkain lea sadji.
Dán jagáš Sápmi Pride galggai lágiduvvot álgoálggus Anáris, muhto doaluid sirde Guovdageidnui proteastan dasa, ahte Guovdageainnu girkoráđđi ii suovvan, ahte seammá sohkabeali olbmot sáhttet náitalit gaskaneaset girkkus. Norggas lea jagi 2008 leamašan rájes lágalaš seammá sohkabeali ovddasteddjiid náitalit gaskaneaset. Sullii 200 olbmo serve Sápmi Pride -ráidovázzimii, mii dollojuvvui lávvordaga. Ráidu vulggii Diehtosiida ovddas ja manai mohki gilis. Sápmi Pride -prográmmas lei maid ee. panelaságastallan ja eahketdoalut, mas loaiddaste Elle Márjá Eira ja Duolva Duottar.
- In livčče goassege jáhkkán, ahte ná olu olbmot servet. Ráidovázzin duođai liggii váimmu, muitala Bruun-Solbakk.
Vaikko Guovdageainnu girku ii suova seamma sohkabeali ovddasteddjiid náitalit gaskaneaset, de Bruun-Solbakk muitala, ahte sii leat ožžon doarjaga girku bealde ee. Egil Lønmos , gii lea provás Sis-Finnmárkkus. Pride-dáhpáhus nogainai dasa, ahte Pride-veahka oassálastii sotnabeaivve dollon ipmilbálvalussii.
- Dat lei hui fiinná vuohki loahpahit dáid doaluid, ahte beasaimet vehá vuoiŋŋastit ja smiehtadit girkus, dadjá Bruun-Solbakk.