Sámi nissonforum (SNF) muitala dieđáhusastis, ahte sámedikkit ja Sámi Parlamentáralaš Ráđđi leat geassemánus 2015 ožžon jearaldaga Riikkaidgaskasaš Eamiálbmotnissoniid Forumas (IIWF/FIMI) árvvoštallat sáhtáliigo álgoálbmotnissoniid boahtte máilmmeviidosaš konferánsa dollojuvvot Sámis. SNF gáibidiige vástádusa Norgga sámedikkis, ahte leago sámediggi vástidan dán jearaldahkii ja doarjugo dat konferánssa lágideami Sámis.
Sámedikki stivralahttu Henrik Olsen muitalii SNF:i, ahte stivra ii leat vel vástidan jearaldahkii. Olsen oainnu mielde dakkár konferánsa ii sáhte lágidit Sámis ovdal jagi 2018. SNF oaivvilda, ahte sámedikkit fertejit meannudit dán áššis farggamusat ja sáddet vástádusa FIMI/IIWF:ii, dannego dál lea gollan juo guokte jagi das go FIMI/IIWF lágidii máilmmi eamiálbmotnissoniidda deaivvadeami. Maŋemus dakkár konferánsa dollojuvvui Limas Peruas Lulli-Amerihkás golggotmánus 2013, masa SNF:ge oassálasttii.
SNF lágidii dilálašvuođa mannan giđa vai IIWF/FIMI ja Norgga sámedikki presideanta Aili Keskitalo deaivvadit ja hupmagohtet dán áššis. Dilálašvuohta lei New Yorkas ON álgoálbmogiid bissovaš foruma (UNPFII) oktavuođas. SNF lei New Yorkas 5 olbmo sáttagottiin sihke ovttasbargguin IIWF/FIMI:ain ja UNPFII čoakkámiin.
Suoma sámedikki ságadoalli Tiina Sanila-Aikio ságastalai áššis UNPFII:s sihke SNF:in ja IIWF/FIMI:ain. SNF oainnu mielde guktot presideanttat válddiiga bures vuostá árvalusa.