Sámedikki ságadoalli Tiina Sanila-Aikio muitalii mannan vahkus dollojuvvon Sámedikki dievasčoakkáma aktavuođas, ahte sihke Ruoŧa ja Norgga Sámedikki leat ilmmuhan, ahte sii hálidit ságastallat oktasaš sápmelašmeroštallamis.
- Dálhan guktot Sámedikkit sihke Ruoŧa ja Norgga bealde leat almmuhan, ahte sidjiide heive váldit dán ášši sagastallama vuollái ja dálhan mii dasto álggahit dan ságastallama ášši birra, muitala Sanila-Aikio.
Sanila-Aikio mielas meroštal-lanáššis leat máŋga beali, muhto son lokte álgoálbmogiid ieš-mearridanrievtti guovddáš áššin aktasaš meroštallama hábmemis.
- Sámiid iešmearrideapmi lea dán meroštallamis dat erenomášvuohta, gažaldat ja prinsihppa. Dat dieđusge lea dán ášši vuođđun, dadjá Sanila-Aikio.
Ulbmilin livččii, ahte aktasaš meroštallan boađálii oassin davviriikkalaš sámesoahpamuša man válmmaštallan lea vel gaskan. Vuosttas hámus davviriikkalaš sámesoahpamušas válbmanii jo jagis 2005. Davviriikkalaš sámesoahpamuš ii goitge vel dála hámis sisttisdoala oktasaš sápmelašmeroštallama.
- Dieđusge dát meroštallanášši lea leamašan guhká ovdan ja sávvamis mii gávnnašeimmet oktasaš meroštallama. Sisdoallu lehkos mii boahtá leahkit, muhto dán dilis livččii sávahahtti, ahte mii eat juohke riikkas manašii áibbas sierra guovlluide dán sápmelašmeroštallanássis, dadjá Sanila-Aikio.