Sámedikki ságadoalli Tiina Sanila-Aikio mielas Anáris mánnodaga lágiduvvon deaivvadeapmi riekteministtar Jari Lindströmin manai bures.
- Munnje bázii vuosttamužžan millii buorre govva ministaris. Son hálida hábmet ollislaš gova sámedikki doaimmain sihke sámiide guoskevaš áššiin, muitala Sanila-Aikio.
Riekteministtar oahpásmuvai deaivvadeami áigge sámekulturguovddáš Sajosii ja dan doaimmaide, sámedikki hálddahussii, sierrafitnuide dego Giellagáldui sihke sámiid, sámegielaid ja sámegielat bálvalusaid sajádahkii ja dillái.
Sanila-Aikio muitala, ahte oanehis deaivvadeami áigge sámediggi ja riekteministtar eai geargan ságastallat ministara duvle almmustahtán dutkamušplánaid birra. Ministara plánan lea ordnet dutkamuša mii dahkko jagis 2016. Dat láktasa ILO 169 -soahpamuššii. Dutkamušas veardádallet álgoálbmotmeroštallama ja eananrivttiid miehtá máilmmi.
Sanila-Aikio deattuha, ahte sámediggi ja riekteministeriija jotket čavga ovttasbarggu ja dollet oktavuođa gaskaneaset.
- Lea dieđusge čielggas, ahte čuovvovaš sámedikki bargun báhcá joatkit das ovddosguvlui, masa mii dál báhcit, oaivvilda Sanila-Aikio.
Sámedikki stivra doalai dán jagi maŋemus čoakkáma mannan bearjadaga. Sámedikki dievasčoakkán doallá dán válgabaji maŋemus čoakkáma juovlamánu 21. beaivve 2015.