Sámedikki ságadoalli Tiina Sanila-Aikio oainnu mielde Alimus hálddahusrievtti (AHR) mearrádus gomihit sámedikki stivrra 18.11.2015 bargan mearrádusa ordnet ođđa sámediggeválggaid lea sápmelaččaid iešmearridanrievtti vuostá.
- AHR lea fas seahkánan sápmelaččaid iešmearridanriektái. Dát ášši buktá ovdan dálá sámediggelága čuolmmaid, maid dan dáfus, ahte alimus mearridanváldi sápmelaččaid iežas áššiin orro sirdašuvvame suopmelaš duopmostullui, mas eai leat sápmelaš ovddasteaddjit, go sápmelaččaid áššiid birra mearriduvvo, oaivvilda Sanila-Aikio.
AHR jelgii sámedikki stivrras ii lean doaibmaváldi mearridit áššiin, main AHR lea juo mearridan láhkafámolaččat. Sanila-Aikio muitala, ahte AHR ii leat vel sádden mearrádusaid sámediggái, de hálddahusas eai leat vel geargan vuodjut mearrádusaid sisdollui dárkkibut. Son árvala, ahte vejolaš váidalus áššis riikkaidgaskasaš orgánaide báhcá ođđa sámedikki árvvoštallama vuollái.
- Ášši lea AHR čakčat bargan mearrádusaid dihte juo Ovttastuvvan našuvnnaid olmmošriektekomitea árvvoštallama vuolde. Jáhkán, ahte dát AHR ođđa mearrádusat váikkuhit maid dan prosessii, dadjá Sanila-Aikio.
Ođđa sámedikki doallá álggahančoakkáma álgojagis.
- Dán dilis go ii leat vejolaš ordnet ođđa válggaid, de sávan, ahte sámediggi ožžo bargoráfi ja lihkostuvvá hábmet buori dili bealuštandihte sápmelaččaid rivttiid, muitala Sanila-Aikio.
