Sámit guđđe aktasaš sier­raoai­vi­la Deanu soah­pa­muš­šii

Deanu soahpamuša Suoma ráđđádallangotti sámelahttut guđđe aktasaš sierraoaivila Deanu soahpamuššii.

Sámiid sierraoaivila váldoágga lea, ahte Deanu ođđa bivdoráddjehusat rihkkot vuođđolága. Čuolbman vuolláičállit oidnet ee. oamastanrievtti geavtima-, sámekultuvrra hárjeheami- ja ealáhusrivttiid ráddjema sihkke vealáhansuoji rihkkuma.

Vuolláičállit deattuhit, ahte sihke Deanu dáluid oamasteaddji ja eanakeahtes sámiid guolástanrievttit leat opmodat. Dasa lassin sii muittuhit, ahte ovttaveardásašvuođa namas sámiin lea seammalágan riekti opmodahkii, go iežáinge Suomas.

Vuolláičálliid mielas ođđa Deanu soahpamuš ja guolástannjuolggadus eai váldde vuhtii sámiid guolástanrivttiid hálddašeaddjin.

- Sámiide livčče galgan juolludit soahpamušas sierra guolásteaddjijoavkostatusa. Sis livčče galgan leat vuoigatvuohta bivdit buot bivdovugiiguin, sii muittuhit.

Sámit vuostálastet maid árbevirolaš bivdovugiid ráddjema.

- Bivdoráddjehusat mannet sohppojuvvon ulbmiiliid badjel. Soahpamuš ráddje árbevirolaš bivdovugiid geavahanvejolašvuođaid sullii 80 proseanttain dálá dási ektui, vuolláičállit moitet.

Sierraoaivila loahpas sámi ovddasteaddjit moitet sáttagotti čoahkkinvuogádaga.

- Čuolbman leamašan, ahte soahpamuš ja guolástannjuolggadus eai leat gieđahallon ovttage oktasaš čoahkkimis, maid oassebeliid sáttagottit leat doallan. Danin mii báikkálaččat eat leat beassán ráđđádallat dásseárvosaččat stáhta sáttagottiid lahttuiguin. Lassin sáttagottiid stivrraid lahttut leat gaskaneaset ráđđádallan. Báikkálaččaide eai leat go dieđihan dáin ráđđádallamiin, vaikke dáin leat dahkkon čadni mearrádusat. Mearrádusat leat dahkkon gulakeahttá sáttagottiid.

Vuolláičállit moitet maid dan, ahte ovdal maŋimuš čoakkáma 22.6.2016 ráđđádallangotti lahttut ožžo soahpamušbáhpáriid easka ovddit eahkeda e-poastta bokte.

- Eat maiddái leat ožžon ovddit Suoma ja Norgga gaskasaš ráđđádallangotti beavdegirjji.