Sámiráđi duodjeprošeakta ovdána.
Odne duorastaga lágiduvvo Johkamohkis almmolaš ságastallan duoji láhkasuoji birra.
Sámiráđi váldočálli Marja Katarina Påve ávžžuha olbmuid boahtit gullat Sámiráđi duodjeprošeavtta birra ja ságastallat duoji suddjema dárbbuin ja hástalusain.
- Mii hálidit gullat buohkaid oaiviliid ja ságastallat daid dehálaš gažaldagain, Påve dadjá.
Duoji láhkasuodji laktása erenoamažit turismii.
- Turisma ja dasa laktáseaddji bálvalusat levvet ain viidáseappot Sámis. Seammás olggobeale olbmot ávkkástallet Sámi duoji ja kultuvrra turismmas ja eará buktagiin. Dát lea dáhpáhuvvan jo máŋgalot jagi, Påve čilge.
Sámiráđđi leage álggahan prošeavtta, man ulbmilin lea guorahallat duoji juridihkalaš suoji dárbbuid.
- Prošeakta galgá hutkat čovdosiid duoji suddjemii. Ulbmilin lea gávdnat juridihkalaš suoji, mii livččii ávkkálaš sámiide ja heivešii olle Sápmái.
Ságastallandilálašvuohta álgá Sámi Duoji dálus Johkamohkis diibmu 17.00 Ruoŧa áigge.