Sámi hip hop-ar­tis­ta vásihii skuv­la­givs­si­dea­mi: “Mu­sihk­ka attii munnje fámu váttis áig­giin"

Nils Rune Uts i dahje SlinCraze, sápmelaš hip hop-artista lea bájaššaddan unna Máze-gilážis, Guovdageainnus. Vaikko Máze orru hui jaskes ja ráfálaš báiki, eallin ii goittotge lean buot áiggiid nu álki.

– Mun ledjen ođđa olmmoš, veháš buoidi ja jaskat. Dan dihte mu lei álki givssidit, muittaša Nils Rune skuvlaáiggiid birra LK Ságaid jearahallamis.

Nils Rune mieđiha ahte sutnje lei hui váttis muitalit ruovttus givssideami birra.

– Sápmelaččat eai leat hárjánan hupmat dovdduid birra ja mun háliidin čájehit ahte lean nanus. Nagodin oalle guhká čiegadit givssideami. In háliidan muitalit ruovttus maidege.

Son fertii gávdnat eará vugiid váivves dillái ja muitala mo son beroštuvai musihkas.

– Go earát givssidedje, de loahpas geavai nu ahte ledjen hui olu okto. 12-jahkasaččan álgenge de guldalit rap- ja hip hop-musihka. Eminem ja Tupac Shakur leigga mu ovdagovat go čohkkájin ruovttus iežan latnjas. Mun álgen váldit inspirašuvnnaid rap-máilmmis. Eminema teavsttat guoskkahedje mu. Dain ledje olu seamma dovddut maid mun ieš ledjen vásihan.

– Mus lei lihkus okta olmmái gii barggai Kárášjogas studios ja su mielde bessen báddet. Álgen čállit iežan šuoŋaid. Go don leat olu okto, de dus leat olu jurdagat oaivve siste ja dainna ládje šadde mu teavsttat, muitala Utsi LK Ságaide. Vuosttáš geardde son lei lávddi alde “Givssideapmi"-bihtáin Sámi Grand Prix-gilvvu oktavuođas jagis 2005.

Nils Runii lea lunddolaš rappet sámegillii. Dat lea su vuohki vástidit iežas givssideddjiide “in your face!", muitalii Nils Rune Lindmo-ságastallanprográmmas mii čájehuvvui Norgga NRK 1 kanálas golggotmánu loahpas.

Sullii 700.000 olbmo oidne su jearahallama. Seamma vahkus čájehuvvui seamma kanálas “Arktisk superstar", Árktalaš supernásti-dokumentára SlinCraze birra. Dat lea ožžon olu rámi dan rájes go lei mielde Romssa filbmafestiválas 2016. Go karrieara lea dál mannáme bajás guvlui, Nils Rune lea fárren Mázes Osloi.

– Muhtin givssideaddjit leat maŋŋel boahtán bivdit ándagassii. Miihan leimmet dušše mánát dalle. Muhto ovddasvástádus gal lea mu mielas vánhemiin. Máŋgii givssideapmi vuolgá juo ruovttus. Ráves olbmot sáhttet leahkit heitot ovdagovat, jurddaša Nils Rune ja háliida muitalit rahpasit iežas vásáhusaid birra vuoi dat rabašii nuoraid čalmmiid.