Guovdageainnus beassášlávvordaga dollon Sámi Grand Prix -juoigangilvvu vuittii mázelaš Johan Ivvár Gaup luđiin Mikkel Andreas ja lávlungilvvu vuittii deatnolaš Ella Marie Haetta Isaksen bihtáin Luoddaearru.
Juoiganoasi vuoiti oaččui 20 000 ruvnna ja bovdehusa loaiddastit jagi 2017 Sámi Musihkkafestiválaide, gos son bálkkašuvvo 30 000 ruvnnain. Lávlunoasi vuoiti oaččui 20 000 ruvnna ja bovdehusa loaiddastit jagi 2017 Sámi Musihkkafestiválaide, gos son bálkkašuvvo 50 000 ruvnnain.
Ohcejohkalaš ja anárlaš Gájanas-joavku bođii nubbin Sámi Grand Prix -lávlunoasis. Joavkkus čuojahit Hildá Länsman , Erkki Feodoroff , Kevin Francett ja Nicolas Francett. Suoma Sámis juoigangilvui searvvaiga vuohččulaš Mathis Ole Vars ja anárlaš Neeta Jääskö . Soai eaba lean guđa superfinálista joavkkus.Dán jagáš Áillohaš-bálkkašupmi geigejuvvui Johan Andreas Andersenii .