Suoma iehčanasvuođa 100 jagi ávvudeami oktavuođas lágiduvvojit maid sámi dáhpáhusat. Dilálašvuođat ordnejuvvojit sámeguovllus ja sámeguovllu olggobealde.
Dalán ođđajagimánus Raahe musihkkavahku olis beassá oahpásmuvvat sámi kultuvrii musihka bokte. Wimme Saari ja Tapani Rinne johtiba Raahes skuvllaid mielde 25. beaivve ođđajagimánu.
Davvi-Suoma 16-19 –ahkásaš nuoraide ordnejuvvo čállingilvu, man fáddán lea čuohtejahkásaš Suopma. Čállingilvu ollašuhttojuvvo ođđajagimánus ja bálkkašumiid juohkin lea cuoŋománus. Buoremus čálus fidne 1000 euro. Gilvui sáhttá searvat maid sámegielat teavsttain. Buoremus teavsttat almmuhuvvojit Kaleva aviissas ja ruovttusiiddus.
Guovvamánus álbmotbeaivve Sámi oahpahusguovddáš ordne Anáris SuomiSápmi 100+100 ávvudoaluid. Dásseválddi presideanta maid searvá Anára doaluide.
Sámi álbmotbeaivve almmuhuvvo sámegielat Yle ealli arkiiva. Yle Sápmi lea čohkken iešguđege sámegielat radiomateriálaid ja dat almmuhuvvojit Ealli arkiiva -siiddus. Dáinna Yle Sápmi ávvuda 70. doaibmajagi.
Njukčamánus Pariissas ordnejuvvo Sámi 2017 –dáhpáhus. Quai Branly -museas lágiduvvo máŋggabealat dáhpáhus ja čájáhus sámi dáidagis, dujiin, ealligovain ja musihkas sihke daid birra ordnejit bargobájiid. Dáiddasemináras ságastallet sápmelaččaid servodatlaš ja politihkalaš sajádagas, gielas sihke sámi kultuvrra boahttevuođas. Dáhpáhus Pariissas 4-5.3.2017.
Sámediggi ordne dáhpáhusaid Anáris, Eanodagas ja Ohcejogas. Oaivilin lea ordnet dilálašvuođaid mat leat oaivvilduvvon buohkaide. Prográmmas leat earálágán ovdanbuktimat, ealligovat, bargobájit ja lassin fállet borramuša. Dilálašvuođaid áiggit almmuhuvvojit maŋŋelaš.
Goasttidanlágádus Kieletär almmuha ávvujagi áigge girječálli Peder Jalvvi Muohtačalmmit –girjji suomagillii. Laktáseaddji dilálašvuođat almmuhuvvojit maŋŋelis.
Ruska Ensemble čájálmasas Arktinen Odysseia leat mielde muhtun sámi divttat. Vuosttas čájáhus lea njukčamánus álbmotteáhteris Helssegis.
Geassit Roavvenjárggas lágiduvvo Jutajaiset –festivála ja dat lea maid seammás festivála 45 jagi ávvujahki. Prográmmas leat dávjá leamaš sámi artisttat ja seammá lohpidit maid dál.
Muistikko ruovttusiiddu bokte čohkkejit maid sámegielat muitalusaid. Siidui sáhttá čállit iežas muitalusa ja almmuhit dan buohkaide lohkan láhkai. Ruovttusiiddu mielde muitalusat vurkejuvvojit oassin oktasaš kulturárbbi.
Ruovttueatnangiela dutkanguovddáža Nammaarkiiva báikenammačoakkáldagat digitaliseren válmmáštuvvá ávvujagi gudnin. Báikenammačoakkáldat sisttisdoallá maid iešguđege sámegielat báikenamaid. Sámegielat báikenamat leat sullii 11000 ghp.
Suomen juhlavuoden aikana myös saamelaistapahtumia
Tapahtumia järjestetään ympäri Suomea ja Pariisissa. Myös saamenkielistä kulttuuriperintöä esitetään, kerätään ja julkaistaan eri hankkeissa.
Saamelaisten kansallispäivänä järjestetään Inarissa SuomiSápmi 100+100, jossa vierailee myös presidentti Sauli Niinistö. Yle Sápmi julkaisee saamenkielisen Elävän arkisto -sivuston.
Maaliskuussa järjestetään monipuolinen Sámi 2017 –tapahtuma Pariisissa.
