Sámi Aviciis Ivan Buljos ođđa elekt­ro­luoh­ti

Guovdageainnolaš DJ ja tv-guoimmuheaddji Ivan Buljo šattai dovddusin Máret Inger elektro-pop-luđiin, mii lea gullon rádios miehtá viiddis Sámi. Spotifys leat čuojaheamit juo badjel 160 000 geardde. Dál sus lea boahtán olggos áibbas ođđa elektrobihtá Mikkel Mathis.

– Máilmminásttit Avicii, Kygo ja Alan Walker. Dat leat mu stuora ovdagovat ja inspirašuvnnat elektrovnnalaš musihkas. Mun lean álot liikon guldalit musihka. Go orron internáhtas Álttás, álgen láittastuvvat, muhto de lihkus fuobmájin ieš ráhkadit musihka ja dan lean bargan dan rájes.

Ovttasbarggus šattai bivnnuhit šuokŋa

Ivana stuorámus hitta, Máret Inger lea oalle ođđa árbevirolaš luohti.

– Luođi oamasteaddji, Máret Inger, bođii munnje ieš evttohit juos mun sáhtášin ráhkadit su luohtái musihka. Ann-Karoline Eira bođii mielde juoiganoassái. Orui hui gelddolaš idea ja moadde mánu maŋŋel dat šattaige de gárvvisin. Oalle jáhketmeahttun ja somá ahte guldaleaddjit liikojedje dasa.

Ođđaseamos luohti Mikkel Mathis bođii olggos juovlamánus.

– Dán luohtái mun liikostuvven gal ovttatmanos ja lean oalle duhtavaš bohtosiin, muitala Ivan ja áigu ain buvttadit eambbo musihka dán jagi mielde.

– Manan ovddesguvlui unna lávkkiiguin. Mus eai leat nu stuora niegut dahje plánat, son joatká.

Buvttada musihka Guovdageainnus

Ivan orru ruovttubáikkistis Guovdageainnus iige pláne dáid lagamus áiggiid fárret gosage guhkelii.

– Interneahtta lea dán áigge dat máilmmi stuorámus gávpot ja dat lea mu deháleamoš bargoreaidu. Doppe leat buohkat eanemus áigge. Go ráhkadat dákkár musihka nugo mun, de it dárbbat maidege eará go dihtora ja muhtin musihkkaprográmmaid. Ii leat eará go álgit, rávve son earáid geat leat beroštuvvan elektrovnnalaš musihkas.

Niehkobargun neaktin

Ivanis lea maiddái eará taleanta ja ii bargga dušše musihkain. Son lea vázzán 3-jahkásaš drámalinnjá Álttá joatkkaskuvllas ja beroštuvvan neaktimis. Mii leat beassange oaidnit su mannan golggotmánu rájes tv-guommuheaddjin NRK Studio Sápmi-prográmmas.

– Neaktin lea mu niehkobargu. Lean loaktan doppe hui bures. Bessen geavahit daid dáidduid maid ohppen teahterlinnjás, namalassii improviseret ja guoimmuhit gehččiid.

Studio Sápmi nogai juovlamánus, muhto Ivan boahtá joatkit humorguoimmuheaddjin.

– Dat lea juste mu šládja. Mun liikon oažžut olbmuid boagustit.

Kuka?

Ivan Buljo

Kotoisin Kautokeinosta ja käynyt musiikki- ja teatteripainoitteisen lukio.Tekee perinteisistä saamelaisista joiuista elektronista musiikkia tietokone-ohjelmien avulla. Esikuvina ja inspiraation lähteinä maailmantähdet Avicii, Kygo ja Alan Walker. Toimii saamenkielisen tv-ohjelman, Studio Sápmin, juontajana.