Sámi Árvvut -searvvi oainnu mielde riikkabeivviid vuođđoláhkaváljagoddi lea massán sierrasajádagas váljagottiid joavkkus iežas doaimma dihte.
- Vuođđoláhkaváljagoddi gomihii mannan válgabaji sámediggelága ođasmahttima iige maid leat dorvvastan meahcceráđđehuslágas sámiid riektesajádaga gárgeheami dego vuođđoláhkaváljagoddi lea ovdal jearggalaččat gáibidan dahkkojuvvot buot láhkafidnuin, mat gusket sámiid, cealká searvi dieđáhusastis.
Searvi cuiggoda maid ráđđehusa sámiid riektedili čielggadeami, mii lea dál barggu vuolde.
- Dálá ráđđehus lea joatkán guhkes suopmelaš servodaga árbevieru dehege viggamuša čoavdit sámiid riektesajádaga diŋgondutkamušaiguin, mat diŋgojuvvojit váldokultuvrra dutkiin. Riikka ráđđehus lea diŋgon dutkamuša njuolga almmá dieđalaš árvvoštallama haga.
Sámi Árvvut rehkenastá, ahte stáhta lea golahan badjel miljon euro diŋgondutkamušaide ja čielggadanolbmuide.
- Várrugas árvvoštallamiidge mielde dutkamušaid golut loktanit badjel miljovnna euroi, main Lappi ja Oulu universiteahtaid ovddit diŋgondutkamušaid golut loktane badjel 600 000 euroi. Dáinna ruđain livččii ee. ruhtadan sámegiel sosiála- ja dearvvašvuohtabálvalusaid ovtta jagi, searvi cealká.
Searvi lei bovdejuvvon vuođđo-láhkaváljagotti Anáris disdaga ordnen ságastallandilálašvuhtii. Searvvi stivrra lahttu Tauno Haltta luobahii dilálašvuođas cealkámuša váljagoddái.