Sámi Árvvut -searvi lea sádden vuoigatvuohtaministeriijai iežas oainnu Jari Lindström (vs) preassadieđáhusa birra.
Searvi cuiggoda garrasit ministtar Lindström evttohusa čielggadit sámerivttiid oassin ILO-válmmaštallama. Čielggadeamit sámiid riektesajádagas ii leat ođđa jurdda, searvi muittuha.
- Čilgehusat leat buktán eanet gažaldagaid go vástádusaid ja dat leat buktán ávkki dušše divrasit bálkáhuvvon dutkiide. Dáiguin čilgehusaiguin dego maid ráđđehusa 19.11. dieđáhusain duddjojuvvo čádjidahtti miellagovva das, ahte áššiid čoavdima várás dahkkojuvvolii juoga. Duohtaáššis čilgehusaiguin dahje dutkamušaiguin háliduvvojit sirdot givssálaš áššit eret beaiveortnegis.
Sámi Árvvut -searvi moaitá ráđđehusa kolonialisttalaš árbevieru joatkimis.
- Mii eat sáhte dohkkehit ráđđehusa dieđáhusa duogášjurdaga das, ahte riikkabeaivvit, stáhtaráđđi ja muhtin dutkit dihtet buorebut go sápmelaččat mii lea sápmelašvuohta ja mat leat sámi kultuvrra dárbbut.
Searvi buktá ovdan iežas čoavddusevttohusa sámiid vuoigatvuohtadillái.
Sin mielas sámiid vuoigatvuođaid galgá gárgehit lágaid bokte ja ovttasráđiid sámi servošiin.
- Sámi Árvvut -searvi gáibida, ahte sámi fidnuid válmmaštallan galgá vuođđuduvvat sámi servoša rabas, vuorrováikkuhuslaš gullamii, sámi servoša dárbbuide ja dihtui vuođđodeaddji ovddalgihtii miehtamii.