Sá­me­nuo­raid dáid­dadáhpá­hus sirdo Vuohčus Anárii - Vál­do­temán iežas jietna

Sámenuoraid dáiddadáhpáhus lágiduvvo dán jagi 12.4. Anáris. Jagi 2018 dáiddadáhpáhusa temán lea ”iežas jietna” ja dáhpáhusa fáttát leat musihkka ja tubben dahjege YouTube-videoid govven.

– Musihkka lea maiddai riikadásis fáddán dán jagi ja go temán lea iežas jietna, heive tubben maiddái hui bures midjiide, muitala Sámenuoraid dáiddadáhpáhusa buvttadeaddji Aleksi Ahlakorpi .

Tubben -gilvvu duopmárin lea Mansikka dahjege Maiju Voutilainen , gii lea okta Suoma bivnnuheamos tubbejeaddjiin. Su kanála čuvvot badjel 160.000 olbmo.

– Lea gal somá oažžut dákkár beakkálmasa duopmárin midjiide. Mansikkkahan finai duorastaga 15.2. Anáris doallamin tubbenskuvlejumi nuoraide ja dan ledje čuovvumin čuođemat nuora ja máná Sajosis ja vel lasi njuolggosáddaga bokte, illuda Ahlakorpi.

Dán jagáš dáiddadáhpáhus lei mearriduvvon álgoálggus lágidit Vuohčus, muhto Soađegili gieldda gádjuneisseváldi mielas Vuohču skuvlla sále lea menddo unni dáhpáhussii.

– Šállošan go mii eat beassan Vuhččui, muhto ovtta láhkái dán sáhttá gal jo gohčodit positiivvalaš váttisvuohtan. Mis leat jo nu ollu sámi nuorat ja sámegiela hálli nuorat, ahte illá gávdno doarvái stuorra sadji dáhpáhussii. Maiddái mánáid ja nuoraid dorvvolašvuohta lea midjiide hui dehálaš ja dasa gullevaš áššiid galgá váldit bures vuhtii dáhpáhusa plánemis, deattuha Ahlakorpi.

Sámenuoraid dáiddadáhpáhusa lágida Sámediggi. Tubbengilvu lea ovttasbargu Arktista pedagogiikkaa -fidnuin. Skuvllaide sáddejuvvojit lassedieđut dáiddadáhpáhusa birra maŋŋelis.

Tästä on kyse

Saamelaisnuorten taidetapahtuma huhtikuussa Inarissa

Saamelaisnuorten taidetapahtuma järjestetään tänä vuonna 12.4. Inarissa. Vuoden 2018 taidetapahtuman teemana on “oma ääni” ja tapahtuman aiheina musiikki ja tubetus eli YouTube-videoiden kuvaaminen. Tubetus-kilpailun tuomarina tulee olemaan Mansikkka eli Maiju Voutilainen, joka on yksi Suomen kuuluisimmista tubettajista. Hänen kanavaansa seuraa yli 160.000 ihmistä.

Taidetapahtuman oli tarkoitus alunperin olla Vuotsossa, mutta Sodankylän kunnan pelastusviranomaisen mielestä Vuotson koulun sali on liian pieni tapahtumalle.