Sámemusea Siida lea rahpan iežas blogga, mas musea bargit muitalit musea árgga birra.
- Mii muitalit dán bloggasteamet museabarggus dasgo dát bargu sáhttá leat muhtin muddui čihkosis, iige oidno stuorrá álbmogii. Blogga čállit leat museabargit, geat barget iešguđetlágan bargguin, dego čoakkáldat- ja čájáhusdoaimmas, museagávppis ja kulturbirasossodagas. Min lohkkit besset diehtit ee. man fiinna diŋggat min čoakkáldagain leat, movt legendáralaš olgomusea divvunbarggut ovdánit dahje mii gullo Nuortalaččaid árbevierrodállui, muitala museahoavda Sari Valkonen bloggas.
Sámemusea bloggateavsttat leat sihke suoma- ja sámegillii. Blogga gávdno čujuhusas samimuseumsiida.wordpress.com
- Mii sávvat, ahte blogga buktá oidnosii museabarggu máŋggahámatvuođa ja dan, ahte man miellagiddevaš bargu dát lea, muitala Valkonen.
Siidas dollojuvvoje mannan vahkus riikkaviidosaš museabeaivvit.