Sá­me­gie­lat te­ra­pii­ja - Muhtun spe­siá­la­buohc­ce­divš­šu bál­va­lu­said vejolaš oažžut Káráš­jo­gas

Sámi sosiála- ja dearvvašvuođabálvalusat ovdánit vehážiid mielde. Ja dat mii ii gávdno Suoma bealde, soaitá gávdnot Norgga bealde.

Dás okta ovdamearka lea Sámi nášuvnnalaš gealbobálvalus (SÁNAG) Kárášjogas, mii bargá gárrenávnnas- ja mielladearvvašvuođafuolahusain. SÁNAG fállá bálvalusaid maid sámegillii ja doppe leat sápmelaš bargit.

Suoma beale sápmelaččat sáhttet geavahit SÁNAG spesiálabuohccedivššu bálvalusaid, jos ožžot doaktáris dasa čálalaš gohččuma.

Dan dahká vejolažžan soahpamuš jagis 2007 gaskkal Lappi buohccedikšunbire ja Finnmárkku buohcceviesu. Soahpamuša dárkkuhus lea buoridit rádjaguovllu olbmuid bálvalusaid, erenoamážit sápmelaččaid gielalaččat ja kultuvrralaččat heivehuvvon bálvalusaid.

SÁNAG fállá ee. psykologalaš divššu, psykoterapiija, birasterapiija ja eará guoskevaš guorahallamiid.

Sámegielat terapiijafálaldat lea Suoma beale sámiide maid vejolaš.

–Vaikko muhtumiidda leage álkit hállat suomagielat terapevtii, de buohkat eai dattege oro ožžon dan veahki man dárbbašedje, lohká Ohcejoga vástideaddji dearvvasvuođaguovddáža doavttir Heidi Eriksen .

Son deattuhage sámi giella- ja kulturáddejumi min dilálašvuođaide.

–Lea dehálaš beassat sámegielat terapevttain háleštit, go son soaitá máhttit jearrat ja skurbat rivttes áššiid iige dárbbaš juohke ášši máhttit ieš čilget. Máŋgii sápmelaš doavttir ádde buorebut, lohká Eriksen.

Son šálloša go riikka dásis mielladearvvašvuođasuorggi bargit nu funet dihtet ahte sámegielat terapiijafálaldat gávdno Kárášjogas.

–Lihkus muhtun ovttaskas Lappi psykiatrat goit dihtet SÁNAG fálaldaga birra ja leat čállán gohččumiid dohko, giitala Eriksen.

Lassin Suoma byrokratiija soaitá leat rádjaáššiin moalkái ja váttis, muhto Eriksen mielde Álbmotealáhuslágádusa (ÁEL) bokte oažžu mátkebuhtadusaid, go lea duođaštusat doaktáriin goappáge bealde rájá.

Hástalusat ihtet dalle go lea sáhka dálkkasdivššus, masa dárbbašuvvojit sierrabuhtadusat, dikšundoarjagat, duođaštusat ja psykiatra B-cealkámušat.

–Dáid áššiid fertet vel čoavdit vai manašii njuovžilit. Dárbbašit bargi Suoma beallái, gii dovddašii maid Norgga beale ortnega. Son sáhtašii de rávvet ÁEL buhtadusaid ektui, árvala Eriksen.

Loga maid:

Mielenterveydestä puhuminen on Suomen saamelaisille usein mahdottomuus – "Moni kokee olonsa nurkkaan ajetuksi" (Yle 25.8.2017)

Hoitoonpääsy - Yhteistyösopimus Helse Finnmark HF:n kanssa 2007 , Lapin sairaanhoitopiiri

Sámi nášuvnnalaš gealbobálvalus - psyhkalaš dearvvašvuođasuddjen ja gárrendilledikšu

Tästä on kyse

Saamenkielistä terapiaa

Samisk nasjonal kompetansetjeneste (SANKS) tarjoaa saamenkielisiä erikoissairaanhoidon palveluja rajaseudun asukkaille. Lähetteen vaativissa palveluissa otetaan huomioon saamelaisten kielliset ja kulttuuriset tarpeet.

Mm. saamekieliset erikoissairaanhoidon palvelut ovat Lapin sairaanhoitopiirin (LSHP) väestön käytettävissä Helse Finnmarkin ja LSHP:n välisen sopimuksen (2007) perusteella.