Sámediggi dohkkehii bearjadaga dollon dievasčoahkkimis doaibmaprográmma ja ekonomiijaplána 2016-2019. Doaibmaprográmmas ovdanbuktojit Sámedikki guovddáš boađusulbmilat válgabadjái 2016-2019.
- Doaibmaprográmma birra Sámedikki lahtut ságastalle viššalit, ja dasa maiddái evttohuvvojedje nuppástusat. Ságastallama bohciidahtte ee. anáraččaid vuoigatvuohtasajádat, boazodoalu nannenvuogit sihke vejolaš stivrabáiki Sámediggái fitnodatsearvi Metsätalous Oy:s mii vuođđuduvvo Meahciráđđehusa oktavuhtii, muitala Sámediggi dieđáhusastis.
Sámedikki lahtut jienastedje stuorámus oasis evttohusain ja loahpas Sámedikki čoahkkin dohkkehii nuppástusaiguin Sámedikki doaibmaprográmma ja ekonomiijaplána jagiide 2016-2019.
Sámedikki njunušulbmilat válgabadjái 2016-2019 leat earret eará davviriikkalaš sámesoahpamuša ráđđádallamiid gearggaheapmi ja ratifiseren, sámiid iešmearridanrievtti ollašuvvan, sámegielaid ealáskahttinprográmma ollašuhttin, álgoálbmotjulggaštusa ollašuhttin Suomas, sámekultuvrra ja árbevirolaš ealáhusaid suoji ollašuvvan sihke gielalaš ja kultuvrralaš rivttiid ollašuvvan olles riikkas.
Dasa lassin sámedikki dievasčoakkán earret eará nammadii ođđa lahtuid sámedikki lávdegottiide daid lahtuid sadjái geat luhpe lávdegoddebáikkiin ja dohkkehii maid Sámedikki bušeahttaárvalusa jahkái 2017.