Sámediggi muitala, ahte sámeguovllu gielddain oahppiid mearri lassánii aktiibuot 34 ja iežá guovlluin vuohon 21 oahppiin.
- Oahppiid mearri lassánii vuođđooahpahusas 65 oahppiin. Logahagas sámegielaid oahppiid mearri fas njiejai logiin. Anárašgiela oahppiid mearri lassánii 11, nuortalašgiela čiežain ja davvisámegiela 39 oahppiin, muitala Sámediggi dieđáhusastis.
Sámeguovllus sámegielat oahpahus addojuvvui 199 vuođđodási oahppái, geain 170 gazze oahpu davvisáme- ja 29 anárašgillii.
- Davvisámegielat oahpahus addojuvvui buot njealji sámiid ruovttuguovllu gielddas. Anárašgielat oahpahusa oahppit ledje buohkat Anára gielddas. Sámegielat oahpahusa oahppiid mearri lassánii ovddit jagis 14 oahppiin. Sámegiela oppalaš oahppiid mearri lassánii Eanodaga gielddas guvttiin, Anára gielddas guđain, Soađegili gielddas 20 ja Ohcejoga gielddas guđain oahppiin, muitala Sámediggi.
Sámegiela fágaoahpahus addojuvvui 461 oahppái, geain 368 ožžo oahpahusa sámeguovllu gielddain ja 93 iežá gielddain. Oktiibuot 61 vuođđodási ja logahaga oahppi sámeguovllu olggobeale gielddain studereje sámegiela lagašoahpahussan ja 32 gáiddusoahpahussan.
Sámeguovllu gielddaid olggobealde lea vejolaš oažžut sámegiela oahpu guokte diimmu vahkus vuođđooahpahusa lassin. Sámeguovllu olggobealde logahaga oahppiin lei liiba čađahit sámegiela kurssaid ee. eatnigiela ja girjjálašvuođa oahppoávdnasiin.