Sihke sámediggi ja sámebálgesat leat guktot bargan dán vahkus iežaset cealkámušaid Suoma riikkabeivviide Meahciráđđehuslágas. Riikkabeivviid eanan- ja meahccedoallováljagoddi (EmV) gieđahallá Meahciráđđehusláhkaevttohusa ihttin. Ulbmilin lea, ahte EmV smiehttamuš válbmana dán vahkus.
Sámiid ruovttoguovllu bálgesiid cealkámuš lei čujuhuvvon oaiveminister Juha Sipiläi . Sámebálgesat gáibidit, ahte Meahciráđđehuslága gieđahallan galgá bissehuvvot, juos dat lea manname dálá hámis riikkabeivviide. Sámebálgesat gáibidit, ahte láhkaevttohussii galgá lasihit, ahte sámeguovllu stáhta hálddašan eatnamiid buvttadangáibádusat galget guđđojuvvot eret ja sámeparagráfat galget máhcahuvvot ruovttoluotta láhkii. Dasa lassin sámebálgesat cuiggode dan, ahte stáhta ii leat sierra gullán sin lága válmmaštallamis.
Sámediggi doarjalii riikkabeaiáirrasiidda sámekultuvrra suodjaleami bealis. Sámediggi muittuhii maid sámeparagráfaid seailluheamis ja buvttadangáibádusaid sihkkumis lágas. Dasa lassin sámediggi muittuhii, ahte ON sierraraporterejeaddji lea cuiggodan Meahciráđđehuslága gieđahallama.
Suomen Kuvalehti -bláđi jelgii Meahciráđđehusláhka máhcahuvvo vel vuođđoláhkaváljagoddái dan maŋŋel go EmV lea addán smiehttamuša láhkaevttohusas. EmV lea bláđi dieđuid jelgii dahkan rievdadusaid láhkaevttohussii ja danne vuođđoláhkaváljagoddi ferte vel aktii árvvoštallat dan.