Oaiveministtar Juha Sipilä (guov.) deaivvai sámedikki ovddasteddjiid sotnabeaivve Anáris.
Sámediggi muitala dieđáhusastis, ahte Sipilä oahpásmuvai sámediggái guoskevaš láhkaásaheapmái, sámiid sajádahkii álgoálbmogin, sámedikki hálddahussii ja sámedikki dán válgabaji guovddášulbmiliidda.
Sámedikki beales deaivvadeapmái oassálaste ságadoalli Tiina Sanila-Aikio , vuosttas várreságadoalli Heikki Paltto , stivralahtut Nilla Tapiola ja Magreta Sara ja hálddahushoavda Pia Ruotsala. Sámediggi muitala, ahte deaivvadeami guovddáš áššin ledje earret eará SODE- ja guovloođastus ja davviriikkalaš sámesoahpamuš sihke sámegielaid dilli.
- Sámediggi gáibidii Sipiläs návccaid sámegielaid ealáskahttinprográmma ollašuhttimii ja ođđa prográmma hábmemii. Dasa lassin lei ságastallan das, ahte makkár mearkkašupmi árbevirolaš ealáhusain lea sámegielaid dillái, muitala sámedikki dieđáhusastis.