Sámedikki skuvlen- ja oahppamateriáladoaimmahat lea almmustahttán sohkaspealu golmma sámegillii.
Sohkaspealu mihttomearrin lea oahpásmuvvat sápmelaččaid sohka- dehge fuolkesániide ja sápmelaš nammaárbevieruide speallamiin.
- Spealus johtet birra Sámeeatnama ja čohkkejit sámi kultuvrii gullevaš dávviriid. Speallanboallun leat kuáti.fi-mánát. Sohkaspeallu sisttisdoallá Sápmi-speallanlávddi, speallanboaluid, dávvirkoarttaid, gážaldatkoarttaid, njuolggadusaid ja birccu, muitala Sámediggi dieđáhusastis.
Sámediggi muitala dieđáhusastis maid, ahte sohkaspeallu lea dahkkojuvvon Sámedikki kuáti-prošeavtta áigge ja dan sáhttá maid čálihit njuolga kuáti.fi-siidduin (www.kuati.fi). Spealu gráfalaš hámis vástida Tytti Bräysy .
Dasa lassin Sámediggi muitala, ahte deaddiluvvon spealu sáhttá diŋgot sámedikki skuvlen- ja oahppamateriáladoaimmahagas.