Tiina Sanila-Aikio válljejuvvui ivttá rahpančoakkámis sámedikki ságadoallin dán válgabadjái. Son oaččui 12 jiena jo vuosttas jienastanjorrosis, mii lea eanetlohku olles dievasčoakkáma jietnamearis ja oaivvildii dan, ahte nuppi jienastanjorrosa eai dárbbašan doallat ollenge.
- Jienasteapmi lei gelddolaš. Lean hui giitevaš ja ilus dán stuorra gudnis man sámedikki lahtut leat čájehan munnje. Dát lea stuorámus gudni man sápmelaš sáhttá Suomas oažžut, muitalii Sanila-Aikio Lapin Kansa Ságaide dađistaga válljejumi maŋŋel.
Sanila-Aikio mielas deháleamos hástalusat sámedikki válgabaji álgui leat Meahciráđđehusláhkaevttohusa gieđahallan ja sámedikki válgabaji doaibmaprográmma gieđahallan ja dan dohkkeheapmi.
Iežá evttohasat ságadoalligilvvus ledje Anu Avaskari , gii oaččui 4 jiena, Tuomas Aslak Juuso , gii oaččui 3 jiena ja Pentti Pieski , gii oaččui 2 jiena. Tiina Sanila-Aikio ságadoallin evttohii Anne Nuorgam , Anu Avaskari ságadoallin evttohii Pigga Keskitalo ja Pentti Pieski ja Tuomas Aslak Juuso ságadoallin evttohii Nilla Tapiola . Tapiola evttohii maid Veikko Feodoroff ságadoallin, muhto Feodoroff geassasii eret gilvvus.
Vuosttas várreságadoallin válljejuvvui Heikki Paltto , gii oaččui 11 jiena jo vuosttas jienastanjorrosis. Vuosteevttohassan leigga Tuomas Aslak Juuso ja Kari Kyrö . Nubbin várreságadoallin válljejuvvui Tuomas Aslak Juuso, gii oaččui nuppi jienastanjorrosis 11 jiena. Vuosteevttohassan lei nuppi jienastanjorrosis Ulla Magga ja vuosttas jienastanjorrosis Ulla Magga lassin maid Kari Kyrö.
Sámedikki stivrii válljejuvvoje Nilla Tapiola , Petra Magga-Vars , Pentti Pieski , ja Magreta Sara .
Várreságadolliid válljema maŋŋel čoakkámis lei guhkes ságastallan das mo galggalii meroštallat nu daddjon guovllobáikkiid stivrras. Stivrii válljejuvvui várreságadolliid váljema maŋŋel Ohcejoga, Lappi-bálgosa ja sámeguovllu olggobealde orru ovddasteaddji.
Rahpančoakkan bázii gaskan diibmu 20.37 ja joatkašuvvá otne.