Anára Sajosis leat lávvardaga duodjemárkanat ja duodjeságastallan.
Sajosis lágiduvvojit lávvardaga skábmamánu 21. beaivve duodjemárkanat ja geavahuvvon dujiid vuovdin. Dáid duodjedáhpáhusaid ordne Sámi Duodji -searvi.
- Márkanat leat buorre báiki oahpásmuvvat sámedujiid ođđa ideaidda ja oastit juovlaskeaŋkkaid. Geavahuvvon dujiid márkaniin fas sáhttá gávdnat duodjemateriálaid, gággásiid, láiggiid, silkkiid ja náhkiid, Sámi Duojis muitaluvvo.
Duodjemárkaniin lea buđaldeapmi maid mánáide. Sámi mánáidkulturguovddáš Mánnu lágida mánáide duodje- ja buđaldanbáji lávvardaga diibmu 10.00–12.00.
Seamma beaivve lágidit Sámiráđđi ja Sámi Duodji vel erenoamaš ságastallama sámi duoji suddjema birra. Dollegáddeságastallan-nammasaš dilálašvuohta álgá diibmu 13.00 Sajosis.
Dilálašvuohta lea nubbi oassi ságastallamii, mii álggii Johkamohkis skábmamánu álggus. Dilalašvuođat lea oassi Sámiráđi prošeavtta. Das Sámiráđđi lea hutkamin čovdosiid sámi duoji suddjemii. Ulbmilin lea gávdnat juridihkalaš suoji duodjái (Sámiráđđi ohcá čovdosiid fakegávttide, Lapin Kansa Ságat 5.11.2015).
Anáris lea lávvardateahkedis maiddái Kaamosjazz-konsearta, mas loaiddasteaba Wimme Saari ja Hilda Länsman . Konsearta álgá diibmu 17.00 Sajosis.