Davimus Lappi Leader hástala smávva sámi servviid ja fitnodagaid ovdánahttit iežaset ruovttuguovllu.
- Juos muhtumis lea mielas juoga smávva prošeakta maid háliidivčče geahččalit, de ávžžuhan válit oktavuođa, hástala Hanna-Leena Talvensaari Davimus Lappi Leader doaimmajođiheaddji.
Talvensaari mielde ovdamearkan sáhtašedje sámi duojárat geahčadit eanet Leader prošeavttaid vejolašvuođaid.
Muhtumat soitet jurddašit ahte Leader prográmma dahje Lappi ealáhus-, johtalus- ja birasguovddáš (EJB) leat dušše sisriikkalaš prošeavttaid várás, muhto doppe sáhttá ohcat ruhtadeami ovdánahttit ovttasbarggu riikarájáid rastá. Rádjaguovlluide ovttasbargu lea lunddolaš.
- Go olbmot dovddadit rájáid rastá de diet láve leat buorre vuođđu maid ovttasbargui prošeavtta dásis, lohká Talvensaari.
Leader prográmma ja Lappi EJB-guovddáš sáhttet juolludit ruhtadeami oppalaččat ávkkálaš prošeavttaide ja fitnodagaid doarjagiidda.
(Joatkašuvvá gova vuolde.)
Durdnosleagis leat máŋggat ovttasbargoprošeavttat fidnen ealáhus-, johtalus- ja birasguovddážis dahje Leader –prográmmas ruhtadeami.
- Sávvat oaidnit eanet ovttasbarggu sámeguovllus, lohká ruhtadanáššedovdi Anna-Kaisa Teurajärvi Lappi EJB-guovddážis.
Searvvis lea vejolaš fidnet EJB-guovddáža bokte 100 % ruhtadeami, jos dat ovddida riikkaidgaskasaš doaimma.
Teurajärvi mielde riikkaidgaskasaš prošeavttain galget leat mielde guokte EU riikka ja dasa lassin sáhttá ovttasbargoguoibmi leat vaikko Norggas dahje Ruoššas, vaikko dat eai gula EU:i.
Dihto eavttuid mielde lea vejolaš oažžut ovdamávssu go prošeakta álgá.
Leader prošeavttaid sáhttet ohcat fitnodagat, searvvit, oasusgottit dahje eará searvvit. Ovttaskas olbmuide eai sáhte juolludit ruhtadoarjaga.
- Davimus Lappi Leader geahččala gávdnat bargi, gii movttiidahttá ja veahkeha jurdagiid ovddideames, muitala Talvensaari.
Sámeguovllus doaibmet Davimus Lappi, Duottar Lappi Leader –ruhtadeaddjit ja EJB-guovddáš, maidda sáhttá váldit oktavuođa ja hábmegoahtit prošeavtta.
Rohkaisevat hakemaan Leader rahoitusta
Leader -ohjelmat ja Lapin ELY-keskus rahoittavat myös saamelaishankkeita.
Nyt halutaan aktivoida pieniä saamelaisyhdistyksiä ja yrityksiä kehittämään kokeilevilla hankkeilla omaa kotiseutuaan.
Saamelaisalueella toimivat Pohjoisimmin Lapin Leader ry ja Tunturi-Lapin Leader ry.
