Sullii 1 200 bohcco leat jápmán ja 13 olbmo, njealjis mánát, leat dolvojuvvon buohccevissui Jamalnjárggas, Ruoššas. Guovlu lea Nenetsiija autonomalaš guovlu. Sivvan lea dáđvesonahat. Áššis muitalit Independent Barents Observer, Ruoŧa sámeradio ja Yle.
Guoktenuppelogi nenetsabearraša leat evakuerejuvvon duoddaris ja eiseválddit áigot dál boahkuhit sullii 3 000 bohcco. Dáđvesonahat ii njoamo olbmos nubbái, muhto dat sáhttá njoammut buohccán eallis olbmui. Divššuhaga sullii njealjádas dávdda ožžon olbmuin jápmá.
Eallidoavttir-dálkkaslašásahusa áššedovdi Karl Ståhl mielas dálkkádatrievdan ja máŋemus áiggiid garra báhkat Davvi-Ruoššas sáhttet leat sivvan dávdda leavvamii.
- Báhkat suddadit girssi ja delle luovvanit dávdda ihtosat eatnamis, lohká Ståhl.
Ståhl dadjá, ahte sis eai leat dieđut, ahte dát dávda goassege livččii leavvan bohccuide Sámis.
- Lea hui unnán várra, ahte dat dange háve čuohcá sámi bohccuide, son dadjá Ruoŧa sámeradioi.
Maid Evira badjedárkkisteaddji Sirpa Kiviruusu mielas lea eahpevuorddehahtti, ahte dávda leavalii Ruošša Oarje-Sibirijjás Supmii. Son dadjá Ylei, ahte biras ferte leat viidát nuoskiduvvon, vai epidemiijjas sáhtálii boahtit nu viiddis dego Oarje-Sibirijjás lea dál.
Independent Barents Observer jelgii dát sáhttá leat stuorimus dáđvesonahatepidemiija Ruoššas goassege. Ruoŧa sámeradio jelgii Lulli-Ruoŧas leat dán geasi jápmán vihtta gusa dán dávdii.